सुरत:
गुजरातमधील सुरत शहरात गँगस्टर सतीश धागडे उर्फ ‘सतीश मराठा’ याची भरदिवसा झालेली निर्घृण हत्या आता पोलिसांच्या तपासात अधिकच धक्कादायक वळण घेत आहे. सतीशच्या हत्येपूर्वी तब्बल सात दिवस त्याच्या कारमध्ये जीपीएस ट्रॅकर बसवून त्याच्या प्रत्येक हालचालीवर बारीक नजर ठेवण्यात आल्याचे तपासात समोर आले आहे. तो कुठे जातो, कोणाला भेटतो आणि कोणत्या मार्गाने प्रवास करतो, याची माहिती हल्लेखोरांपर्यंत पोहोचत असल्याचा संशय पोलिसांना आहे. हत्येचे हे नियोजन पाहून तपास यंत्रणाही हादरली आहे.
भेस्तान परिसरात बुधवारी, ५ ऑगस्ट रोजी सतीश मराठाची हत्या करण्यात आली. रिअल इस्टेटसह विविध बेकायदेशीर धंद्यांमध्ये वर्चस्व निर्माण करण्याच्या संघर्षातून ही हत्या झाल्याचा प्राथमिक अंदाज आहे. या प्रकरणातील धक्कादायक बाब म्हणजे हत्येचा कथित मुख्य सूत्रधार राहुल मंडल उर्फ ‘राहुल अपार्टमेंट’ हा सध्या लाजपोर कारागृहात होता. तुरुंगात असतानाच त्याने हत्येचा कट रचल्याचा पोलिसांचा संशय असून, त्याच्यावर हल्लेखोरांना आर्थिक मदत केल्याचाही आरोप आहे.
कारमध्ये ट्रॅकर, सात दिवस प्रत्येक हालचालीवर नजर
सतीशच्या कारच्या ड्रायव्हर सीटजवळ हत्येच्या सुमारे सात दिवस आधी जीपीएस ट्रॅकर बसवण्यात आल्याचे भेस्तान पोलिसांच्या तपासात उघड झाले आहे. या उपकरणाच्या माध्यमातून सतीशचे लाईव्ह लोकेशन मिळवले जात होते का, त्याच्या हालचालींची माहिती कोणाला दिली जात होती आणि त्याचा वापर हल्ल्याचे ठिकाण व वेळ निश्चित करण्यासाठी करण्यात आला का, याचा तपास सुरू आहे.
ट्रॅकर कोणी खरेदी केला, तो सतीशच्या कारमध्ये कोणी बसवला आणि त्यातून मिळणारी माहिती नेमकी कोणापर्यंत पोहोचत होती, याचा पोलिस शोध घेत आहेत. या धाग्याचा थेट संबंध राहुल मंडलपर्यंत जातो का, याचीही कसून चौकशी केली जात आहे.
मैत्रिणीच्या डोळ्यांसमोर ३९ वार
हत्येच्या दिवशी सतीश मराठा आपल्या २० वर्षीय मैत्रिणीसोबत कारमधून प्रवास करत होता. अलठाण येथील भगवान महावीर कॉलेज परिसरातून त्याने मैत्रिणीला कारमध्ये घेतले होते. दोघे भेस्तान परिसरातून जात असताना हल्लेखोरांनी त्यांची कार गाठली आणि सतीशवर अचानक हल्ला चढवला.
हल्लेखोरांनी सतीशवर तब्बल ३९ वार केल्याची माहिती समोर आली आहे. मैत्रिणीच्या डोळ्यांसमोरच हा रक्तरंजित हल्ला करण्यात आला. हल्ल्यानंतर आरोपींनी घटनास्थळावरून पलायन केले.
महाराष्ट्रात पळून जाण्यापूर्वी नऊ जण पोलिसांच्या जाळ्यात
हत्या केल्यानंतर आरोपी गुजरातबाहेर पसार होण्याच्या तयारीत होते. पोलिसांनी तातडीने तपासाची चक्रे फिरवत तीन अल्पवयीन मुलांसह एकूण नऊ जणांना तापी जिल्ह्यातील सोनगड-उच्छल मुख्य रस्त्यावरून ताब्यात घेतले. आरोपी महाराष्ट्राच्या दिशेने पळून जाण्याच्या तयारीत असल्याचे तपासात समोर आले आहे.
या सर्वांकडून हत्येच्या कटातील भूमिका, शस्त्रे, आर्थिक व्यवहार, संपर्क आणि जीपीएस ट्रॅकरशी असलेला संबंध याबाबत माहिती मिळवण्याचा प्रयत्न सुरू आहे.
जेलमध्ये बसून कट; राहुल मंडल पोलिसांच्या ताब्यात
सुरतचे सहाय्यक पोलीस आयुक्त (J डिव्हिजन) एस. सी. तारडे यांच्या माहितीनुसार, हत्येचा मुख्य कट लाजपोर कारागृहात रचला गेल्याचा प्राथमिक तपास आहे. राहुल मंडल उर्फ ‘राहुल अपार्टमेंट’ याचा या कटामागे सहभाग असल्याचा पोलिसांचा संशय आहे.
पोलिसांनी कारागृहात असलेल्या राहुल मंडलचा ताबा घेतला असून त्याला न्यायालयात हजर केले. न्यायालयाने त्याला पाच दिवसांची पोलीस कोठडी सुनावली आहे. जीपीएस ट्रॅकर, हल्लेखोरांशी संपर्क, पैशांची देवाणघेवाण आणि हत्येचे नियोजन याबाबत त्याची चौकशी केली जात आहे.
एकेकाळचे जिवलग मित्र झाले कट्टर दुश्मन
सतीश मराठा आणि राहुल मंडल हे एकेकाळी अत्यंत जवळचे मित्र होते. फेब्रुवारी २०२० मध्ये वेद रोडवरील कार्यालयात झालेल्या कुख्यात डॉन ‘सूर्या मराठी’च्या हत्याकांडात दोघेही सहआरोपी होते. या प्रकरणात दोघांनी सुमारे चार वर्षे तुरुंगवास भोगला. त्यानंतर गेल्या वर्षी जुलैमध्ये त्यांची निर्दोष मुक्तता झाली होती.
मात्र, तुरुंगातून बाहेर आल्यानंतर दोघांच्या संबंधांमध्ये कटुता निर्माण झाल्याचे पोलिस तपासातून समोर येत आहे. पांडेसरा, भेस्तान, डिंडोली, गोडादरा आणि लिंबायत परिसरातील अवैध दारूविक्री आणि जुगाराच्या धंद्यावर वर्चस्व मिळवण्यावरून त्यांच्यात संघर्ष निर्माण झाला. पूर्वी एकमेकांसाठी जीव देण्याची भाषा करणारे हेच दोघे अखेर एकमेकांच्या जीवावर उठल्याचे या हत्याकांडातून समोर आले आहे.
‘लाईव्ह लोकेशन’पासून थेट हत्येपर्यंत; पोलिसांसमोर अनेक प्रश्न
सतीशच्या कारमध्ये जीपीएस ट्रॅकर बसवण्यामागचा नेमका उद्देश काय होता, ट्रॅकरमधून मिळणारी माहिती कोण पाहत होते, ही माहिती तुरुंगात असलेल्या राहुल मंडलपर्यंत पोहोचत होती का, हल्लेखोरांना सतीशच्या हालचालींचे थेट अपडेट दिले जात होते का आणि हत्येच्या दिवशी हल्ल्याची वेळ व ठिकाण याच माहितीच्या आधारे निश्चित करण्यात आले का, या प्रश्नांची उत्तरे आता तपासातून शोधली जात आहेत.
सध्या नऊ आरोपी ताब्यात असून राहुल मंडलची पोलीस कोठडीत चौकशी सुरू आहे. त्यामुळे जीपीएस ट्रॅकरपासून सुरू झालेला हा धागा नेमका कुठपर्यंत पोहोचतो आणि सतीश मराठाच्या हत्येचा संपूर्ण मास्टरमाइंड कोण, याचा उलगडा होण्याची शक्यता आहे.
