प्रधानमंत्री आवास योजनेंतर्गत अत्यल्प उत्पन्न गटाला परवडणाऱ्या घरांचा पर्याय
मुंबई प्रतिनिधी
मुंबई : स्वतःच्या हक्काच्या घराचे स्वप्न पाहणाऱ्या सर्वसामान्य नागरिकांसाठी म्हाडाने आनंदाची बातमी दिली आहे. मुंबई महानगर प्रदेशात (एमएमआर) प्रधानमंत्री आवास योजना (शहरी) २.० अंतर्गत तब्बल १ हजार ४०० परवडणारी घरे उभारण्याचा महत्त्वाकांक्षी निर्णय म्हाडाच्या कोकण मंडळाने घेतला आहे. विशेष म्हणजे, या घरांची संभाव्य किंमत अवघी २० ते २२ लाख रुपये असणार आहे. त्यामुळे महागाई, वाढते घरभाडे आणि खासगी बांधकाम व्यावसायिकांच्या आवाक्याबाहेर गेलेल्या घरांच्या किमती यामुळे स्वतःचे घर घेण्याचे स्वप्न लांबणीवर पडलेल्या अल्प उत्पन्न गटातील कुटुंबांना मोठा दिलासा मिळण्याची शक्यता आहे.
अंबरनाथ आणि कल्याण परिसरात या घरांची उभारणी केली जात आहे. एकूण १ हजार ४०० घरांपैकी सुमारे ९५० घरांच्या बांधकामाला प्रत्यक्ष सुरुवात झाली आहे. उर्वरित ४५० घरांचे प्रकल्प विविध प्रशासकीय आणि तांत्रिक मंजुरीच्या प्रक्रियेत आहेत. पुढील तीन वर्षांत सर्व घरांचे बांधकाम पूर्ण करण्याचे कोकण मंडळाचे नियोजन आहे.
अंबरनाथमध्ये सर्वाधिक घरांची निर्मिती
कोकण मंडळाने अंबरनाथ परिसरात घरांची निर्मिती करण्यावर विशेष भर दिला आहे. अंबरनाथनजीक कोचकुंटवली येथे तब्बल ६०० घरांचे बांधकाम सुरू आहे. याशिवाय शिवगंगानगर येथे ३५० घरांची उभारणी प्रस्तावित असून, या प्रकल्पाच्या आराखड्याला अद्याप मंजुरी मिळणे बाकी आहे.
मोरीवली येथे आणखी १०२ घरे उभारण्याचे नियोजन असून, त्यासाठी निविदा प्रक्रिया राबविण्यात येणार आहे. दुसरीकडे, कल्याणनजीक घोटेघर येथे ३४८ घरांचे बांधकाम सुरू आहे. अशा प्रकारे अंबरनाथ आणि कल्याण परिसरात एकूण १ हजार ४०० घरांची निर्मिती केली जाणार आहे.
३२० चौरस फुटांचे घर, किंमत २० ते २२ लाख
प्रधानमंत्री आवास योजनेंतर्गत उभारण्यात येणारी ही घरे अत्यल्प उत्पन्न गटातील नागरिकांसाठी असणार आहेत. प्रत्येक घराचे चटई क्षेत्रफळ सुमारे ३२० चौरस फूट असेल. या घरांची संभाव्य किंमत २० ते २२ लाख रुपयांच्या दरम्यान निश्चित होण्याची शक्यता आहे.
खासगी बांधकाम व्यावसायिकांकडील घरांच्या तुलनेत परवडणाऱ्या दरात घरे उपलब्ध करून देण्याचा म्हाडाचा प्रयत्न आहे. विशेष म्हणजे, या घरांची विक्री थेट खुल्या बाजारात न करता म्हाडाच्या अधिकृत सोडतीद्वारे केली जाणार आहे. बांधकाम पूर्ण झाल्यानंतर पात्र लाभार्थ्यांना लॉटरी प्रक्रियेतून घरांचे वितरण करण्यात येईल.
घरांसाठी कर्ज उपलब्धतेसाठीही प्रयत्न
अत्यल्प उत्पन्न गटातील नागरिकांना घर खरेदी करताना आर्थिक अडचणींचा सामना करावा लागतो. घराची किंमत परवडणारी असली, तरी बँकांकडून गृहकर्ज मिळवताना अनेक अडथळे येतात. ही बाब लक्षात घेऊन विविध बँकांच्या माध्यमातून पात्र लाभार्थ्यांना गृहकर्ज उपलब्ध करून देण्यासाठीही म्हाडाकडून सहकार्य करण्याचे नियोजन असल्याची माहिती यापूर्वी समोर आली आहे.
तीन वर्षांत घरांचे स्वप्न साकारण्याचे उद्दिष्ट
मुंबई आणि परिसरातील घरांच्या गगनाला भिडलेल्या किमती पाहता अंबरनाथ आणि कल्याणसारख्या भागांत २० ते २२ लाख रुपयांत घर उपलब्ध होणे ही सर्वसामान्यांसाठी महत्त्वाची संधी ठरू शकते. मात्र, प्रकल्प वेळेत पूर्ण होणे, आवश्यक पायाभूत सुविधा उपलब्ध होणे आणि घरांच्या किमती अंतिमतः परवडणाऱ्या राहणे या बाबीही तितक्याच महत्त्वाच्या असतील.
एकीकडे घरांच्या किमती वाढत असताना दुसरीकडे परवडणाऱ्या घरांची मागणी वाढत आहे. या पार्श्वभूमीवर म्हाडाच्या कोकण मंडळाने हाती घेतलेला १ हजार ४०० घरांचा प्रकल्प पूर्ण झाल्यास एमएमआर परिसरातील अनेक कुटुंबांचे स्वतःच्या घराचे स्वप्न प्रत्यक्षात उतरू शकते.
