विटा प्रतिनिधी
सांगली जिल्ह्यातील विटा येथील कार्वे (ता. खानापूर) औद्योगिक वसाहतीत असलेल्या रामकृष्ण हरी माऊली इंडस्ट्रीजवर छापा टाकून २९ कोटी ७३ लाख ५५ हजार २०० रुपयांचे एमडी ड्रग्ज व त्यासाठी लागणारे साहित्य जप्त केले.
याप्रकरणी रहुदीप धानजी बोरिया (४१, उत्तीयादरा कोसंबा, जि. सूरत, गुजरात राज्य), सुलेमान जोहर शेख (३२, मुंबई), बलराज अमर कातारी (२४, साळसिंगे रोड, विटा) या संशयितांना अटक केल्याची माहिती पोलिस अधीक्षक संदीप घुगे यांनी पत्रकार परिषदेत दिली.
दरम्यान, तीन संशयितांना विटा न्यायालयाने १ फेब्रुवारीपर्यंत पोलिस कोठडीत ठेवण्याचा आदेश दिल्याचे पोलिसांनी सांगितले. ही कारवाई सोमवारी रात्री पावणेआठच्या सुमारास स्थानिक गुन्हे अन्वेषण शाखा सांगलीच्या पथकाने केली. याबाबत पोलिस सागर गिरीजापती टिंगरे यांनी विटा पोलिसांत फिर्याद दिली.
नशेखोरीविरोधात ‘सकाळ’ने आवाज उठवल्यानंतर पोलिस अधीक्षक घुगे यांनी कारवाई करण्याचे आदेश दिले. काही दिवसांपूर्वी सांगलीत नशिल्या इंजेक्शनचा साठा जप्त केला होता. महात्मा गांधी पोलिसांनी आतापर्यंत १२ जणांच्या मुसक्या आवळल्या. पश्‍चिम महाराष्ट्रात हे रॅकेट उघडकीस आले. त्यानंतर एलसीबीच्या पथकाने कारवाई करत नशाबाजाराला दणका दिला आहे. पुढील टप्प्यात ही कारवाई आणखी व्यापक प्रमाणावर करण्यात येईल, असे अधीक्षक घुगे यांनी स्पष्ट केले.
विटा-सांगली रस्त्यालगत असणाऱ्या औद्योगिक वसाहतीत कच्च्या साहित्यांच्या सहाय्याने मशीनद्वारे मेफॉड्रॉन (एमडी) तयार केले जात असल्याची माहिती सांगलीच्या स्थानिक गुन्हा अन्वेषण शाखेच्या पोलिसांना मिळाली. त्यानुसार पोलिस निरीक्षक सतीश शिंदे यांनी त्यांच्या टीमसह सोमवारी रामकृष्ण हरी माऊली इंडस्ट्रीजमध्ये मेफॉड्रॉन (एमडी) तयार केले जात असलेल्या ठिकाणी छापा टाकला. त्यात २९ कोटी ७३ लाख ५५ हजार २०० रुपयांचे तयार एम.डी. ताब्यात घेतले. संशयित रहुदीप धानजी बोरिया (उत्तीयादरा कोसंबा, जि. सूरत, गुजरात राज्य), सुलेमान जोहर शेख (३२, मुंबई), बलराज अमर कातारी (साळसिंगे रोड, विटा) यांना ताब्यात घेतले.
याबाबत पोलिस अधीक्षक घुगे म्हणाले, ”यातील संशयित रहुदीप बोरिया हा रेकॉर्डवरील आरोपी असून त्याचे बीएस्सी केमिस्ट्री शिक्षण झाले आहे. त्यास केमीकल प्रॉडक्शनबाबत चांगली माहिती आहे. एक महिन्यापासून रहुदीप बोरिया, बलराज कातारी व सुलेमान शेख यांनी कार्वे (ता. खानापूर) गावच्या हद्दीत असलेल्या विटा येथील एकाचा प्लॉट नंबर ४३ मधील कारखाना ३० हजार रुपये प्रतिमहिना भाड्याने घेतला आहे. त्याबाबत त्यांच्यात अद्याप कोणताही करार झाला नाही. त्या ठिकाणी रहुदीप बोरिया व सुलेमान शेख तेथे असणाऱ्या कच्च्या साहित्यांच्या सहाय्याने मशीनद्वारे मेफॉड्रॉन (एमडी) माल तयार करीत होते. तो माल विक्रीसाठी बलराज कातारी हा बाहेर घेऊन जात असल्याची माहिती मिळाली होती.
वरील तीन संशयितांना सहाय्यक पोलिस निरीक्षक पंकज पवार व पथकाने मुद्देमालासह ताब्यात घेतले. या गुन्ह्याचे धागेदोरे शोधण्याचे काम सुरू आहे. यामध्ये अजून आरोपी निष्पन्न होण्याची शक्यता आहे.” ही कारवाई विशेष पोलिस महानिरीक्षक सुनील फुलारी, पोलिस अधीक्षक संदीप घुगे, उपविभागीय पोलिस अधिकारी सचिन थोरबोले यांच्या मार्गदर्शनाखाली स्थानिक गुन्हा अन्वेषणचे पोलिस निरीक्षक सतीश शिंदे, धनंजय फडतरे, पंकज पवार, सिकंदर वर्धन, अच्युत सूर्यवंशी, सागर टिंगरे, संदीप गुरव, अमोल पैदाळे, नागेश खरात, मच्छिंद्र बर्डे, दरीबा बंडगर, सागर लवटे, अनिल कोळेकर, उदय साळुंखे, इम्रान मुल्ला, नागेश कांबळे, संजय पाटील, अमर नरळे, सतीश माने, महादेव नागणे, संदीप नलवडे, उदय माळी, अनंत कुडाळकर, विक्रम खोत, प्रमोद साखरपे, सुनील जाधव, गणेश शिंदे यांनी केली.
