नवी दिल्ली
नवी दिल्ली. क्रीडा मंत्रालयाने जानेवारीच्या पहिल्या आठवड्यात 2024 च्या क्रीडा पुरस्कारांची घोषणा केली होती. यानंतर आज, शुक्रवारी (17 जानेवारी) राष्ट्रपती भवनात राष्ट्रपती द्रौपदी मुर्मू यांच्याहस्ते क्रीडा पुरस्कार विजेत्यांचा सन्मान करण्यात आला.
यावेळी पॅरिस ऑलिंपिकमध्ये दोन पदके जिंकणारी भारताची महिला नेमबाज मनु भाकेर आणि गेल्या महिन्यात जागतिक बुद्धिबळ अजिंक्यपद विजेता भारतीय ग्रँडमास्टर डी गुकेश यांच्यासह आणखी दोन खेळाडूंना मेजर ध्यानचंद खेलरत्न पुरस्काराने सन्मानित करण्यात आले. तर 2024 मध्ये खेळातील उत्कृष्ट कामगिरीसाठी 34 खेळाडूंना अर्जुन पुरस्काराने गौरविण्यात आले. यावेळी क्रीडा मंत्री मनसुख मांडवीय आणि इतर केंद्रीय मंत्री देखील राष्ट्रपती भवनात उपस्थित होते.
22 वर्षीय मनु भाकर हिने गेल्या वर्षी ऑगस्ट महिन्यात पॅरिस ऑलिंपिकमध्ये 10 मीटर एअर पिस्तूल वैयक्तिक आणि मिश्र सांघिक स्पर्धेत कांस्यपदक जिंकून एकाच ऑलिंपिकमध्ये दोन पदके जिंकणारी भारतातील पहिली खेळाडू बनली होती. तर पॅरिस ऑलिंपिकमध्ये हरमनप्रीत सिंगच्या नेतृत्वाखाली भारतीय संघाने सलग दुसऱ्या कांस्यपदक जिंकले होते. यानंतर पॅरा हाय जंपर प्रवीणने पॅरिस पॅरालिम्पिकमध्ये टी-64 प्रकारात सुवर्णपदक जिंकले होते. महत्त्वाचे म्हणजे गेल्या महिन्यात 18 वर्षीय डी गुकेश हा जागतिक बुद्धिबळ अजिंक्यपद स्पर्धेत सर्वात तरुण विश्वविजेता बनला होता. तसेच तो गेल्या वर्षी बुद्धिबळ ऑलिंपियाडमध्ये भारतीय संघाच्या ऐतिहासिक सुवर्णपदकाचा शिल्पकार देखील होता.
दरम्यान, खेलरत्न व्यतिरिक्त आज 2024 मध्ये खेळातील उत्कृष्ट कामगिरीसाठी 34 खेळाडूंना अर्जुन पुरस्काराने सन्मानित करण्यात आले. यात सुचा सिंग आणि पॅरा जलतरणपटू मुरलीकांत राजाराम पेटकर यांना अर्जुन पुरस्कार जीवनगौरव प्रदान करण्यात आला. तर कोचिंगमधील उत्कृष्टत कामगिरी केलेल्या पाच जणांना द्रोणाचार्य पुरस्कार मिळाला. यामध्ये बॅडमिंटन प्रशिक्षक एस मुरलीधरन आणि फुटबॉल प्रशिक्षक अरमांडो अ‍ॅग्नेलो कोलाको यांचा आजीवन श्रेणीत समावेश आहे
