नागपूर प्रतिनिधी
राज्यात आज पार पडलेल्या नगरपालिका आणि नगरपंचायत निवडणुकांच्या पार्श्वभूमीवर उद्या निकाल लागणार अशी तयारी होती. मात्र, मुंबई उच्च न्यायालयाच्या नागपूर खंडपीठाच्या निर्णयामुळे मतमोजणी प्रक्रिया आता थेट २१ डिसेंबरपर्यंत तहकूब झाली आहे.
निवडणुकीची पारदर्शकता अबाधित राहावी, तसेच काही स्थानिक स्वराज्य संस्थांच्या निवडणुकांवर न्यायप्रविष्ट प्रक्रिया सुरू असल्याने पुढील निवडणुकीवर उद्याच्या निकालाचा परिणाम होऊ नये, याच कारणांनी निकाल एकत्रित जाहीर करण्याचे आदेश न्यायालयाने दिले.
यापूर्वीच २० नगरपरिषदांची निवडणूक न्यायालयीन प्रक्रियेच्या कारणास्तव २० डिसेंबरपर्यंत पुढे ढकलण्यात आली होती. त्यामुळे सर्व निवडणुकांचे निकाल एकाच दिवशी जाहीर व्हावेत, अशी मागणी एका याचिकेद्वारे करण्यात आली होती. हा युक्तिवाद मान्य करत न्यायालयाने राज्य निवडणूक आयोगाला स्पष्ट निर्देश दिले.
मतदान आज पार पडले असले, तरी मतमोजणी आता २१ डिसेंबरलाच होणार आहे. तोपर्यंत राज्यात आचारसंहिता लागूच राहणार असून, कोणत्याही प्रकारचे एक्झिट पोल प्रसिद्ध करण्यास सक्त मनाई राहील, असेही न्यायालयाने नमूद केले.
राज्याच्या स्थानिक स्वराज्य राजकारणातील या महत्त्वाच्या घडामोडीने उमेदवार आणि पक्षांच्या हिशेब–किताबांवर नवीन समीकरणे निर्माण केली आहेत. आता २१ डिसेंबरलाच मतदारांच्या निर्णयाची उकल होणार आहे.
