हरियाणा :
लग्नासारख्या आनंदाच्या सोहळ्यात मुलींची छेड काढणाऱ्या टोळक्याला रोखल्याची केवळ शिक्षा… रोहतकच्या नामांकित बॉडीबिल्डर रोहित धनकडला आपल्या जीवाने मोजावी लागली. तब्बल २० जणांच्या हल्ल्यात गंभीर जखमी झालेल्या रोहितचा मृत्यू झाला. या धक्कादायक घटनेमुळे भिवानीसह संपूर्ण हरियाणा हादरला आहे.
लग्नातील छेडछाडीला रोहितची ठाम विरोधाची भूमिका
रोहतकच्या हुमायूँपूर येथील रहिवासी व जिम ट्रेनर असलेला रोहित धनकड शुक्रवारी आपल्या मित्र जतिनसोबत भिवानीत लग्नसोहळ्यासाठी आला होता. तिगडाणा गावातील बारातीत काही तरुण मुलींना त्रास देत असल्याचे रोहितने पाहताच त्याने तात्काळ हस्तक्षेप केला. त्याने टोळक्याला रोखत मुलींचे संरक्षण केले, मात्र यावरून तिथे वाद निर्माण झाला. पुढे परिस्थिती शांत झाली, पण रोहितने दाखवलेले धाडस काहींच्या मनात रागाचा ठिणगा पेटवून गेले.
फिल्मी स्टाईलने पाठलाग, आणि लोखंडी रॉडने जीवघेणा हल्ला
लग्नानंतर रोहित व जतिन रोहतकला परतत असताना तीच टोळी २० जणांसह पुन्हा त्यांच्या मागे लागली. दोघांची कार पाठीमागून वेगाने पाठलाग करत भिवानीजवळील रेल्वे फाटकाजवळ गाडी अडवण्यात आली. लोखंडी रॉड, धारदार शस्त्रे हातात घेतलेल्या हल्लेखोरांनी दोघांवर तुटून पडत चित्रपटातील गँग हल्ल्यासारखा थरकाप उडवणारा प्रसंग घडवला. जतिन कसाबसा तिथून पळून गेला, मात्र रोहितची अमानुष मारहाण झाल्याने जागीच प्रकृती ढासळली. तत्काळ रुग्णालयात नेल्यावर डॉक्टरांनी त्याला मृत घोषित केले.
“रोहितच्या देहावर एकही जागा जखमेशिवाय नव्हती,” असे काका सतीश धनकड यांनी सांगताना अश्रू अनावर झाले.
राष्ट्रीय स्तरावरील शरीरसौष्ठवपटूचा दुर्दैवी अंत
२०१८ साली राष्ट्रीय शरीरसौष्ठव स्पर्धेत वरिष्ठ व ज्युनियर १०७+ किलो गटात दुहेरी सुवर्णपदक पटकावणारा, तसेच त्याच वर्षी तत्कालीन मुख्यमंत्री मनोहर लाल खट्टर यांच्या हस्ते सन्मानित झालेला रोहित आजही स्थानिक तरुणांचा आदर्श मानला जात होता. जिम ट्रेनर म्हणूनही त्याची ख्याती होती.
घरातील एकमेव आधार हिरावला
रोहितचे वडील २०१७ मध्ये निधन पावले होते. घरात आई आणि बहीण असताना संपूर्ण कुटुंबाचा आधार असलेला हा तरुण अचानक हिरावल्याने धनकड कुटुंबियांवर दुःखाचा डोंगर कोसळला आहे. “आरोपींना फाशी द्या, अन्यथा पोलिसांनीच एनकाउंटर करावा,” अशी मागणी कुटुंबीयांनी संतापून केली आहे.
या निर्मम हत्याकांडामुळे महिला सुरक्षेवर, तसेच छेडछाड रोखण्यासाठी धाडस करणाऱ्या नागरिकांच्या सुरक्षिततेवर मोठे प्रश्नचिन्ह उभे राहिले आहे.
