मालेगाव प्रतिनिधी
मालेगाव तालुक्यातील डोंगराळे गावात तिन्ही वर्षांच्या चिमुरडीवर अत्याचार करून निर्घृणपणे हत्या झाल्याच्या हृदय पिळवटून टाकणाऱ्या घटनेने राज्यभरातून संतापाची लाट उसळली आहे. १६ नोव्हेंबर रोजी गावातील विजय संजय खैरनर (२४) या आरोपीने अल्पवयीन मुलीवर अत्याचार करून दगडाने ठेचून हत्या केली. प्रकरणाची माहिती मिळताच पोलिसांनी आरोपीला ताब्यात घेतले असून, गुन्ह्याचा तपास गतीने सुरू आहे.
या गंभीर प्रकरणाची तात्काळ दखल घेत महिला व बालविकास मंत्री आदिती तटकरे यांनी पीडित कुटुंबाला “मनोधैर्य” योजनेअंतर्गत १० लाख रुपयांची मदत मंजूर केल्याची माहिती दिली. “अल्पवयीन मुलीवर झालेल्या अमानुष अत्याचाराची घटना अत्यंत संतापजनक आणि मानवतेला काळिमा फासणारी आहे. या कुटुंबावर झालेली मानसिक आणि सामाजिक हानी अपरिमित आहे. शासन त्यांच्या पाठीशी ठामपणे उभे आहे,” असे त्या म्हणाल्या.
मंत्री तटकरे यांनी प्रशासनाला तातडीने मदत उपलब्ध करून देण्याचे निर्देश दिले होते. त्यानुसार नियमांनुसार १० लाखांची मदत मंजूर करण्यात आली आहे. ही मदत तात्कालिक दिलासा देणारी असली तरी “वास्तविक झालेली हानी कोणत्याही आर्थिक सहाय्याने भरून न येणारी आहे,” असेही त्यांनी स्पष्ट केले.
तपास प्रक्रियेत समन्वय, आवश्यक कायदेविषयक मार्गदर्शन, पीडित कुटुंबाच्या रक्षणासाठी उपाययोजना आणि पुनर्वसन प्रक्रियेसाठी विभाग पूर्ण कटिबद्ध आहे, अशी माहितीही मंत्री तटकरे यांनी दिली. संबंधित यंत्रणांना याबाबत आवश्यक सूचना देण्यात आल्याचेही त्यांनी सांगितले.
दरम्यान, या अमानुष कृत्याच्या निषेधार्थ लासलगावमध्ये सुवर्णकार समाजाने मूक मोर्चा काढत आरोपीवर कठोरातील कठोर शिक्षा व्हावी, फास्टट्रॅक कोर्टात खटला चालवून फाशीची शिक्षा देण्यात यावी, अशी मागणी करत निवेदन सादर केले. महिलांचा आरोपावर तातडीने कठोर कारवाई करण्याचा आवाज मोर्चात बुलंद झाला.
डोंगराळे येथील या हृदयद्रावक घटनेने राज्यातील बालसुरक्षेविषयी अनेक प्रश्न निर्माण केले असून, प्रशासन व कायदा यंत्रणांसमोर गुन्हे रोखण्याचे मोठे आव्हान उभे राहिले आहे.
