ठाणे प्रतिनिधी
अंबरनाथ : अंबरनाथ पूर्व-पश्चिम जोडणाऱ्या उड्डाणपुलावर शुक्रवारी संध्याकाळी झालेल्या भीषण अपघाताने परिसर हादरला. अनियंत्रित झालेल्या कारने दुचाकींना जोरदार धडक दिल्याने चौघांचा जागीच मृत्यू झाला असून शिवसेना (शिंदे गट) नेत्या किरण चौबे यांच्यासह तीन जण गंभीर जखमी झाले आहेत.
मिळालेल्या माहितीनुसार, शिवसेना नेत्या किरण चौबे या आपल्या कार्यकर्त्यांसोबत निवडणुकीच्या प्रचाराला निघाल्या होत्या. त्यावेळी कारचा चालक लक्ष्मण शिंदे यांना हृदयविकाराचा झटका आला. अचानक चालकाचे नियंत्रण सुटल्याने कार उड्डाणपुलावर वेगाने झिगझॅग धावत गेली आणि पुढील दोन दुचाकींवर आदळली. धडकेचा आवाज प्रचंड असल्याने काही क्षणांतच परिसरात गोंधळ उडाला.
या अपघातात शैलेश जाधव, चंद्रकांत अनारके, सुमित चैलानी आणि कारचा चालक लक्ष्मण शिंदे यांचा जागीच मृत्यू झाला. तर अभिषेक चव्हाण, अमित चव्हाण आणि शिवसेना (शिंदे गट) उमेदवार किरण चौबे या गंभीर जखमी झाल्या आहेत. तिन्ही जखमींवर खासगी रुग्णालयात उपचार सुरू आहेत.
घटनास्थळावर स्थानिकांनी तत्काळ धाव घेत पोलिसांना कळवले. पोलिसांनीही काही मिनिटांतच घटनास्थळी पोहोचून जखमींना रुग्णालयात हलवले तसेच मृतदेह शवविच्छेदनासाठी पाठवले. या प्रकरणी अपघाताची नोंद करण्यात आली असून नेमक्या कारणांचा तपास सुरू आहे.
अपघातग्रस्त कार ही शिवसेना नेत्या किरण चौबे यांच्या नावावर असल्याची माहिती पोलिसांनी दिली आहे. या घटनेमुळे अंबरनाथ परिसरात शोककळा पसरली आहे.
