नांदेड प्रतिनिधी
नांदेड शहरात प्रेमसंबंधातून पेटलेल्या वैमनस्याने थरकाप उडवणारी घटना उघडकीस आली आहे. २५ वर्षीय सक्षम ताटे या तरुणाची त्याच्याच जवळच्या मित्राने, वडिलांच्या मदतीने, गोळ्या झाडून निर्घृण हत्या केली. विशेष म्हणजे, सक्षमच्या मृत्यूनंतर त्याची प्रेयसी आंचल मामीडवार हिने अंत्यविधीपूर्वी अंगाला हळद, कपाळावर कुंकू लावून मृतदेहाशीच ‘विवाह’ करून सर्वांना हादरवून सोडलं.
सक्षम ताटे आणि आरोपी हिमेश मामीडवार हे मित्र. मात्र सक्षमचा हिमेशच्या २१ वर्षीय बहिणी आंचलसोबत प्रेमसंबंध जुळले. ही माहिती घरच्यांना मिळाल्यानंतर मामीडवार कुटुंब संतप्त झालं. जातीयतेच्या उफाळलेल्या रागातून हा गुन्हा घडल्याचं प्राथमिक तपासात समोर आलं आहे. सक्षम ताटे हा दलित होता. आंचल हि उच्च वर्णीय होती.अशी माहिती समोर येत आहे.
मैत्रीचाच विश्वासघात
दीड महिन्यापूर्वीच सक्षम तुरुंगातून सुटून आला होता. जुन्या गंज भागात तो बसलेला असताना आंचलचे वडील गणेश मामीडवार, भाऊ हिमेश, साहिल आणि दोघा साथीदारांनी त्याच्यावर गोळ्या झाडल्या. एवढ्यावरच न थांबता, फरशीने डोक्यात प्रहार करून त्याची हत्या केली. घटनास्थळावरून पळ काढल्यानंतर परिसरात तणाव पसरला.
प्रेयसीची धक्कादायक कृती
हत्येची माहिती समजताच आंचल सक्षमच्या घरी धावून गेली. अंत्यविधीपूर्वी तिने स्वतःच्या अंगाला हळद आणि कपाळावर कुंकू लावलं. त्यानंतर सक्षमच्या मृतदेहाला कुंकू लावून, शवाजवळ पारंपरिक पद्धतीने ‘लग्न’ केल्याची माहिती स्थानिकांकडून मिळाली. “सक्षम नसला तरी मी त्याचीच पत्नी आहे. त्याच्या घरीच राहणार,” असा निर्धार तिने व्यक्त केला.
‘माझा प्रियकर मरूनही जिंकला’
तीन वर्षांपासून त्यांचे प्रेमसंबंध असल्याचं आंचलने सांगितलं. “तो सुटून आल्यानंतर माझ्या घरच्यांनी त्याला मारण्याचा डाव रचला होता. वडील आणि भावाने त्याचा जीव घेतला. पण capable ला मारूनही ते हरले… माझा प्रियकर मरूनही जिंकला,” अशा शब्दांत तिने कुटुंबातील सदस्यांबद्दल संताप व्यक्त केला. हत्या करणाऱ्यांना कठोर शिक्षा देण्याची मागणीही आंचलने केली आहे.
या हृदयद्रावक घटनेने नांदेड तसेच राज्यभरात संतापाची लाट पसरली असून पोलिसांनी आरोपींच्या शोधासाठी विशेष पथक तैनात केलं आहे.
