मालेगाव प्रतिनिधी
लासलगावच्या गजबजलेल्या बाजारपेठेत काही दिवसांपूर्वी शांतपणे घडलेली एक चोरी पोलिसांच्या तांत्रिक तपासामुळे उघडकीस आली आहे. सराफा दुकानात दागिने खरेदीचा बहाणा करत ट्रेमधील सोन्याची अंगठी हातचलाखीने लंपास करणाऱ्या मालेगावातील ‘बंटी–बबली’ जोडीला अखेर नाशिकच्या स्थानिक गुन्हे शाखेने जेरबंद केले. सराफा दुकानदारांमध्ये भितीचे वातावरण निर्माण करणाऱ्या अशा प्रकारच्या गुन्ह्यांना यामुळे मोठा आळा बसेल, असा विश्वास पोलिसांनी व्यक्त केला आहे.
दुकानात प्रवेश, बुरख्यातील महिला आणि सोबतचा तरुण…
निफाड तालुक्यातील लासलगाव येथील वर्मा ज्वेलर्समध्ये काही दिवसांपूर्वी काळा बुरखा परिधान केलेली एक महिला आणि तिच्यासोबतचा तरुण दागिने पाहण्याच्या उद्देशाने दाखल झाले. दुकानदाराशी सौजन्याने बोलत त्यांनी सोन्याच्या अंगठ्यांची मागणी केली. काऊंटरवर मांडलेल्या ट्रेमधील दागिने पाहताना त्यांची नजर एखाद्या ग्राहकाप्रमाणेच शांत होती; परंतु त्यामागे एक आखलेला प्लॅन होता.
पोलिसांच्या तपासानुसार, दागिने पाहताना या दोघांनी हातचलाखीने जवळपास ५ ग्रॅम वजनाची, अंदाजे ५५ हजार रुपये किंमतीची सोन्याची अंगठी चोरून घेतली. त्याच क्षणी तिच्या जागी बेनटेक्सची अंगठी ठेवण्याची त्यांची सफाई दुकानदारालादेखील कळली नाही. काही वेळ दुकानात थांबून, कोणतीही खरेदी न करता दोघेही तेथून निघून गेले.
एक बेनटेक्स आणि उलगडणारा संशय
काही काळानंतर ट्रेची दाखल घेताना मूळ सोन्याची अंगठी गायब झाल्याचे दुकानदाराच्या लक्षात आले. लगेचच लासलगाव पोलिस ठाण्यात तक्रार दाखल करण्यात आली. हा प्रकार दागिने खरेदीच्या नावाखाली केलेल्या हातचलाखीच्या गुन्ह्यांचा असल्याचे प्राथमिक चौकशीत समोर आले.
दरम्यान, नाशिक ग्रामीण पोलीस अधीक्षक बाळासाहेब पाटील यांनी या गुन्ह्याच्या तपासासाठी स्थानिक गुन्हे शाखेला विशेष सूचना दिल्या. त्यांच्या मार्गदर्शनाखाली पथकाने अभिलेख तपासताना गुन्ह्याची पद्धत, देहबोली आणि आधीच्या गुन्ह्यांतील साम्य यातून संशय मालेगावातील दोन व्यक्तींवर गेला.
पोलिसांची नेमकी टिप, ‘बंटी–बबली’ अटकेत
स्थानिक गुन्हे शाखेच्या पथकाने सलीम नगरमधील नाजीया शेख इसराईल (३२) आणि गायकवाड चौकातील शेख करीम शेख आमीन (१९) या दोघांना ताब्यात घेऊन चौकशी केली. सुरुवातीला टाळाटाळ करणाऱ्या दोघांनी शेवटी पोलिसांच्या दबावाखाली चोरीची कबुली दिली.
तपासात उघड झाले की त्यांनी चोरी केलेली सोन्याची अंगठी मालेगावातील एका सराफाला केवळ १५ हजार रुपयांना मोडली होती. पुढील तपासासाठी दोघांना लासलगाव पोलिसांच्या ताब्यात देण्यात आले असून न्यायालयाने त्यांना अटक करण्यात आली आहे.
आणखी काही गुन्ह्यांची शक्यता?
पोलिसांनी दिलेल्या माहितीनुसार, यापूर्वीही राज्यातील विविध शहरांमध्ये अशाच पद्धतीने हातचलाखी करणाऱ्या या जोडीचा समावेश चोरीच्या टोळ्यांमध्ये असल्याचा संशय आहे. त्यांच्या अटकेनंतर आणखी काही गुन्हे समोर येण्याची शक्यताही गुन्हे शाखेने व्यक्त केली आहे.
कुशल तपासासाठी पथकाचा विशेष गौरव
ही कारवाई अपर पोलिस अधीक्षक आदित्य मिरखेलकर, तेगबिरसिंह संधू यांच्या मार्गदर्शनाखाली पोलीस निरीक्षक रविंद्र मगर यांच्या पथकाने केली. प्रशांत पाटील, चेतन संवत्सरकर, सुधाकर बागूल, सुभाष चोपडा, दत्ता माळी, संदीप राठोड, हेमंत गिलबिले, प्रदीप बहिरम, नितीन गांगुर्डे, अस्मिता मढवई आणि निकीता बोरसे यांनी तपासात महत्त्वाची भूमिका बजावली.
लासलगाव प्रकरणातील ही तपासकारवाई केवळ एका चोरीचा गुन्हा उघडकीस आणणारी नसून सराफा व्यवसायाला छुप्या हातचलाखीच्या टोळ्यांपासून सुरक्षित ठेवण्यासाठी पोलिस यंत्रणा किती सजग आहे, याचेही दाखला ठरली आहे.
