स्वप्‍नील गाडे| रिपोर्टर
मुंबई : वांद्रे (पूर्व) येथील खेरवाडी बाजार रोडवरील एका ज्वेलर्स दुकानातून तब्बल 40 लाख रुपये किमतीचे सोन्याचे दागिने चोरून पळ काढणाऱ्या टोळीला निर्मलनगर पोलिसांनी अवघ्या 12 तासांत गजाआड केले. पकडलेल्या चार जणांमध्ये एका तरुणीचाही समावेश आहे.
ग्राहक बनून केले चोरीचे कटकारस्थान
पीडित दागिन्यांच्या दुकानाचे मालक रविवारी सकाळी दुकानात काम सुरू असताना दोन युवक आणि एक तरुणी ग्राहक म्हणून दुकानात आले. दुकानदाराने काउंटरवर ठेवलेल्या दागिन्यांच्या फोल्डरमधील चेन दाखवणे सुरू केले. त्याचवेळी त्या तीन जणांपैकी एकाने फोनवर बोलत दुकानाचे काचेचे दार उघडले. वागणे संशयास्पद असले तरी महिलेमुळे दुकानदाराने दुर्लक्ष केले. याच संधीचा फायदा घेऊन चौथा साथीदार दुकानात शिरला आणि काउंटरवरील सोन्याच्या साखळ्यांचा फोल्डर उचलून आरोपीने बाहेर ठेवलेल्या बाइकवर बसून क्षणात फरार झाला . फोल्डरमध्ये 25 हून अधिक सोन्याच्या साखळ्या असून त्यांची किंमत सुमारे 40 लाख रुपये होती.
सीसीटीव्हीत कैद झाले सर्व आरोपी
घटना घडताच दुकानात खळबळ उडाली. दरम्यान ग्राहक म्हणून आलेले तिघेही शांतपणे दुकानातून निसटले. मात्र दुकानातील सीसीटीव्ही कॅमेऱ्यात सर्व आरोपी स्पष्टपणे कैद झाले होते. तक्रार दाखल होताच डीसीपी मनिष कलवनिया आणि वरिष्ठ पोलीस निरीक्षक रमेश वाघ यांच्या मार्गदर्शनाखाली एपीआय भोयर, पीएसआय सुदर्शन बनकर आणि पोलीस पथकाने आरोपींच्या शोधाला वेग दिला.
वांद्रेचाच रहिवासी ठरला मुख्य सूत्रधार
पोलिसांनी परिसरातील खबर्‍यांना सीसीटीव्ही फुटेज दाखवले असता मुख्य आरोपीची ओळख पटली. तो वांद्रे (पूर्व) परिसरातीलच रहिवासी असल्याचे समोर आले. पोलिसांनी त्याला ताब्यात घेऊन चौकशी केली असता त्याने गुन्ह्याची कबुली दिली आणि इतर साथीदारांची माहिती दिली. त्यावरून काही तासांतच पोलिसांनी चारही आरोपींना अटक केली. त्यांची नावे श्रावण हरिद्वार नाविक, सोनाली सुरेंद्र सिंह यादव, फजील नासीर परमार आणि अमान उस्मान शेख अशी आहेत.
पोलिसांनी आरोपींकडून 32 लाख रुपये किमतीचे सोन्याचे दागिने हस्तगत केले असून उर्वरित दागिन्यांचा शोध सुरू आहे. कोर्टाने चारही आरोपींना पोलिस कोठडी सुनावली असून पुढील तपास सुरू आहे.
