पुणे प्रतिनिधी
ताम्हिणी घाट (रायगड) : कोकण सफरीची आखलेली योजना शेवटची ठरली. पुण्यातील उत्तमनगर येथील सहा तरुणांचा थार वाहन ताम्हिणी घाटातील सुमारे पाचशे ते हजार फूट खोल दरीत कोसळून भीषण अपघात झाला. मध्यरात्री झालेल्या या दुर्घटनेत सर्व तरुणांचा जागीच मृत्यू झाला असून, जिवंत अवस्थेत कोणीही सापडलेले नाही.
दरी अतिशय खोल, परिसर निर्जन व रात्रीचा काळ असल्याने अपघाताची कोणालाही कल्पना आली नाही. गुरुवारी (दि. २०) सकाळी ड्रोनच्या मदतीने शोधमोहीम सुरू असताना दरीत थार (एमएच १२ वायएन ८००४) आणि मृतदेह दिसून आल्यानंतर बचावकार्यात गती आली.
मृत तरुणांची ओळख
या अपघातात शहाजी चव्हाण (२२, रा. कोंढवे धावडे), पुनित सुधाकर शेट्टी (२०), साहिल साधू बोटे (२४), महादेव कोळी (१८), ओंकार सुनील कोळी (१८) आणि शिवा अरुण माने (१९, सर्व रा. कोपरे, पुणे) यांचा जागीच मृत्यू झाला. मित्रांचा हा गट सोमवारी (दि. १७) रात्री ११.३० वाजता उत्तमनगरहून कोकण प्रवासासाठी निघाला होता. मात्र, सकाळपर्यंत संपर्क न झाल्याने कुटुंबीयांनी उत्तमनगर पोलीस ठाण्यात हरवल्याची तक्रार दिली.
लोकेशन ट्रेस करून पोलिसांची शोधमोहीम
पोलिसांनी सीसीटीव्ही फूटेज व मोबाईल लोकेशनच्या आधारे ताम्हिणी घाट परिसरात शोध सुरू केला. रायगड हद्दीतील कोंडेथर गावानंतरच्या पहिल्याच तीव्र वळणावर वाहन कोसळल्याचा प्राथमिक अंदाज व्यक्त करण्यात आला आहे.
बचावकार्याला अनेक पथकांची मदत
दरीत अडकलेल्या वाहनापर्यंत पोहोचण्यासाठी माणगाव पोलिसांसह रायगड व मुळशी आपत्ती व्यवस्थापन पथके, शेलार मामा रेस्क्यू टीम, पुणे रेस्क्यू टीम आणि स्थानिक ग्रामस्थांनी संयुक्त मोहीम राबवली. तीन मृतदेह बाहेर काढण्यात आले असून, उर्वरित तीनही मृतदेह सापडले आहेत. त्यांना वर आणण्याचे प्रयत्न उशिरापर्यंत सुरू होते.
घाटातील अपघातप्रवण वळणांबाबत स्थानिकांचे मत
स्थानिक सामाजिक कार्यकर्ते प्रमोद बलकवडे, शेलार मामा, अंकुश ढमाले आणि माजी सरपंच संदीप बामगुडे यांनी सांगितले की,
“ताम्हिणी घाटातील वळणे अतिशय धोकादायक असून, खोल दऱ्या, घनदाट जंगल आणि अंधारामुळे येथे अपघातांची शक्यता जास्त असते. सध्याची रेलिंग्स अपुरी असून, जास्त उंच व मजबूत भिंती, गतीरोधक, तसेच स्पष्ट प्रतिबंधात्मक फलकांची तातडीने गरज आहे.”
ताम्हिणी घाटातील ही दुर्घटना पुन्हा एकदा या मार्गावरील सुरक्षेची गंभीर गरज अधोरेखित करून गेली आहे.
