मुंबई प्रतिनिधी
मुंबईतील बांधकाम व्यवसायाशी संबंधित वाढत्या वाद-तणावाच्या पार्श्वभूमीवर पुन्हा एकदा दिवसाढवळ्या गोळीबाराची धक्कादायक घटना समोर आली आहे. कांदिवलीच्या चारकोप परिसरात बुधवारी दुपारी एका तरुण बांधकाम व्यावसायिकावर अज्ञात दोघांनी गोळ्या झाडल्याने परिसरात भीतीचे वातावरण निर्माण झाले आहे.
चारकोपमधील बंदर पाखाडी येथील पेट्रोल पंपासमोर फ्रेंडी दिलीमा भाई हे कारमध्ये बसलेले असताना दोन अज्ञात मोटरसायकलस्वारांनी त्यांच्यावर २ ते ३ राऊंड फायरिंग केल्याची माहिती पोलिसांनी दिली. अचानक झालेल्या हल्ल्यात त्यांच्यावर दोन गोळ्या पोटात लागल्या असून त्यांना तात्काळ बोरिवलीतील ऑस्कर रुग्णालयात दाखल करण्यात आले आहे. त्यांची प्रकृती चिंताजनक असल्याचे रुग्णालयातील सूत्रांनी सांगितले.
घटनेनंतर हल्लेखोर पळून जाण्यात यशस्वी झाले. चारकोप पोलीस, स्थानिक पथक तसेच डीसीपी यांनी घटनास्थळी धाव घेतली. परिसरातील सीसीटीव्ही फुटेज गोळा करून आरोपींचा शोध सुरू असून फॉरेन्सिक टीमने घटनास्थळाची पाहणी केली आहे. दिवसाढवळ्या झालेल्या या हल्ल्यामुळे स्थानिक रहिवाशांमध्ये मोठी दहशत पसरली आहे.
दरम्यान, या घटनेवरून मनसेनं पोलिसांवर तीव्र नाराजी व्यक्त करत परिसरातील कायदा-सुव्यवस्थेवर प्रश्नचिन्ह उपस्थित केले आहे. “चारकोपमध्ये गोळीबार हा रोजचाच प्रकार झाला आहे. नवरात्रोत्सवात झालेला यादवचा खून, त्यानंतर शेखरवरील गोळ्या… हे सर्व पाहता गुंडांचे मनोबल वाढल्याचे दिसते. ‘दहा घरांत तपासणी केली तर एका घरात गावठी कट्टा सापडेल’, असं चित्र चारकोपमध्ये आहे. पोलिसांनी तातडीने घरोगरी तपासणी सुरू करावी, अन्यथा मनसे रस्त्यावर उतरेल,” असा इशारा मनसे चारकोप विधानसभा अध्यक्ष दिनेश साळवी यांनी दिला.
बांधकाम क्षेत्रातील कोट्यवधींची उलाढाल, भूखंड वाद, आर्थिक व्यवहारातील मतभेद यामुळे या क्षेत्रात गेल्या काही वर्षांत गुन्हेगारी घटनांची संख्या वाढत असल्याचे पोलिसांचे निरीक्षण आहे. दिवसाढवळ्या झालेल्या या हल्ल्यामुळे बांधकाम व्यावसायिक सुरक्षेचा मुद्दा पुन्हा ऐरणीवर आला आहे.
