बीड प्रतिनिधी
मनोज जरांगे पाटील यांनी शुक्रवारी घेतलेल्या पत्रकार परिषदेत माजी मंत्री धनंजय मुंडे यांच्यावर थेट हत्येचा कट रचल्याचा गंभीर आरोप केला. “मुंडेंनी मला ठार मारण्याचा कट रचला, औषधांद्वारे घातपात करण्याचा विचारही झाला,” असा दावा जरांगे यांनी केला.
यानंतर धनंजय मुंडे यांनी परळी येथे घेतलेल्या पत्रकार परिषदेत या सर्व आरोपांना फेटाळून लावत थेट पलटवार केला. “माझ्यावर आरोप करणाऱ्या जरांगे पाटलांसह माझी सीबीआय चौकशी, नार्कोटेस्ट, ब्रेन मॅपिंग करा, अशी माझी मागणी आहे. माझ्यावर आरोप करून कोणीही स्वच्छ ठरत नाही,” असे मुंडे म्हणाले.
मुंडे यांनी यावेळी राज्याचे उपमुख्यमंत्री देवेंद्र फडणवीस यांच्याच नावाचा उल्लेख करत टोला लगावला. “मुख्यमंत्री फडणवीसांना वाईट वाटेल, पण बीडमधील यंत्रणा जरांगे पाटलांना घाबरते,” असा गंभीर आरोप मुंडेंनी केला.
मराठा आरक्षणाच्या मुद्द्यावरही मुंडेंनी जरांगे यांना प्रश्न विचारला. “मराठा समाजाला फायदा ओबीसीमधून होतो की ईडब्ल्यूएसमधून? हा प्रश्न मी दोनदा विचारला, पण उत्तर आजपर्यंत मिळाले नाही,” असे मुंडे म्हणाले.
“मी जरांगे यांच्या आंदोलनाला मदत केली. परळी नगरपालिकेपासून बीड जिल्हा परिषदेत मराठा आरक्षणाचा ठराव मीच मांडला. गोपीनाथ मुंडे यांच्या संस्कारातून मी घडलो आहे,” असे सांगत मुंडेंनी स्वतःची भूमिका स्पष्ट केली.
ते पुढे म्हणाले, “मी जरांगे यांच्या एका उपोषणाला तोडून दाखवले आहे. त्यांच्या आंदोलनात नेहमी सहकार्य केले. तरीसुद्धा आज माझ्याविरोधात खोटे आरोप होत आहेत. जरांगे पाटलांना वाटते की धनंजय मुंडे या पृथ्वीतलावर नसावेत,” असा संतप्त सूर त्यांनी लावला.
मुंडेंनी राज्यातील तणावपूर्ण वातावरणावरही चिंता व्यक्त केली. “जरांगे यांच्या आंदोलनामुळे राज्यातील वातावरण बिघडले आहे. समाजात समतोल राखण्याची जबाबदारी आपली सगळ्यांची आहे. छत्रपती शिवरायांनी घालून दिलेली परंपरा आपण विसरत चाललो आहोत,” असेही मुंडे म्हणाले.
मुंडे यांच्या या तीव्र प्रतिक्रियेनंतर जरांगे,मुंडे संघर्ष अधिकच तीव्र होण्याची चिन्हं दिसत आहेत.
