पनवेल प्रतिनिधी
कॉर्पोरेट क्षेत्रातील वरिष्ठ अधिकाऱ्याकडून सहकाऱ्याचा गैरवापर केल्याचा धक्कादायक प्रकार पनवेलमध्ये उघडकीस आला आहे. कामाच्या निमित्ताने परिचय झाल्यानंतर विश्वास संपादन करत आरोपीने महिलेला घरी बोलावले. पाहुणचाराच्या बहाण्याने गुंगी आणणारे औषध देऊन तिच्यावर लैंगिक अत्याचार केल्याचे आणि त्याचे व्हिडिओ बनवून खंडणी उकळल्याचे समोर आले आहे.
पनवेल शहर पोलिसांनी प्रदीप नरळे (वय 34) याला अटक केली आहे. तर या प्रकरणी त्याची पत्नी रेणुका नरळे आणि भाऊ प्रवीण नरळे हे फरार आहेत. पोलिस त्यांचा शोध घेत आहेत.
ऑनलाइन ओळख आणि विश्वासाचा गैरफायदा
प्रदीप नरळे हा अंधेरीतील एका विमा कंपनीत शाखा व्यवस्थापक म्हणून काम करतो. ऑनलाइन मिटिंगदरम्यान नागपूर शाखेतील महिला अधिकाऱ्याशी त्याची ओळख झाली. कामाच्या निमित्ताने वाढलेला संपर्क पुढे वैयक्तिक नात्यात परिवर्तित झाला.
27 मार्च रोजी मुंबईत कामानिमित्त आलेल्या महिलेवर नरळे याने विश्वासाचा गैरफायदा घेत पनवेलमधील आपल्या घरी बोलावून गुंगी आणण्याचे औषध देत अत्याचार केला. त्यावेळी आरोपीची पत्नीही घरी उपस्थित असल्याचे पोलिसांनी सांगितले.
व्हिडिओद्वारे धमकी, लाखोंची उकळी
पीडित महिला शुद्धीवर आल्यानंतर तिचे दागिने व रोकड गायब असल्याचे तिला आढळले. त्यानंतर आरोपीने अश्लील व्हिडिओ दाखवत बदनामीची धमकी देत पैशांची मागणी सुरू केली. भीतीपोटी महिलेकडून तब्बल 8 लाख 11 हजार रुपये उकळण्यात आल्याचे तपासात समोर आले.
महिलेने अखेर पतीला संपूर्ण प्रकार सांगत नागपूरच्या सिताबर्डी पोलिस ठाण्यात तक्रार दिली. तपासानंतर प्रकरण पनवेल पोलिसांकडे वर्ग करण्यात आले आहे.
पनवेल पोलिसांनी प्रदीप नरळेला अटक केली असून त्याची पत्नी आणि भाऊ फरार आहेत. त्यांचा शोध सुरू असल्याचे पोलिसांनी स्पष्ट केले आहे. या प्रकरणी पुढील तपास सुरू आहे.
