पेण प्रतिनिधी
रायगड जिल्हा भाजपा महिला सरचिटणीस तथा रायगड जिल्हा शांतता कमिटी सदस्य वंदना म्हात्रे यांचा मुलगा मनीष नरेंद्र म्हात्रे याने अल्पवयीन मुलीला लग्नाचे आमिष दाखवून व व्हिडिओ व्हायरल करेन, अशी धमकी देऊन सप्टेंबर महिन्यापासून अनेक वेळा लैंगिक अत्याचार केल्याची घटना घडली आहे. पीडित मुलगी 15 वर्षांची आहे. याबाबत पेण पोलीस ठाण्यात 24 फेब्रुवारी रोजी रात्री उशिरा पोक्सोअंतर्गत गुन्हा दाखल करण्यात आला आहे.
याविषयी सविस्तर वृत्त असे की, यातील पिडीत मुलगी आणि मनिष यांची स्नॅप चॅटवरून मे २०२४ मध्ये ओळख झाली. त्यावर ते एकमेकांशी बोलू लागले. ऑगस्ट २०२४ मध्ये मनिष याने पिडीत मुलीला तु मला आवडतेस मला तुझ्यासोबत लग्न करायचे आहे, असे बोलून तिला प्रेमाच्या जाळयात ओढले. सायन्स विषयाच्या नोटस्‌ घेण्यासंदर्भात ते साई मंदिर पेण येथे भेटले. त्यानंतर सप्टेंबर महिन्यात मनिष याने आपल्या चिंचपाडा येथील शिवानी गृहनिर्माण संस्था येथे घरी बोलावले आणि तिच्या इच्छेविरुध्द तिच्यावर अत्याचार केला.
मात्र २३ फेब्रुवारी २०२५ रोजी पीडित मुलीच्या वडिलांसमोर हा प्रकार उघडकीस आला. दरम्यान पोलिसांनी यातील आरोपी मनिष याला ताब्यात घेतले आहे.
भाजपच्या नेत्या तथा आमदार चित्रा वाघ या महिलांच्या अत्याचाराविरुध्द सतत आवाज उठवत असतात. महिलांचा आवाज म्हणून त्या आख्या महाराष्ट्रात सुपरिचित आहेत. मात्र आत्ता त्यांच्याच पक्षाच्या पदाधिकारी महिलेच्या मुलाने १५ वर्षाच्या मुलीवर गेली सहा महिने अत्याचार केला आहे. त्याविरुध्द त्या आवाज उठवून पिडितेल न्याय देणार का? असा सवाल जनसामान्य जनतेला पडला आहे.
