मुंबई प्रतिनिधी
देशभरातील बँक ग्राहकांसाठी महत्त्वाची बातमी आहे. २८ ते ३० सप्टेंबर २०२६ या कालावधीत प्रस्तावित असलेल्या तीन दिवसांच्या देशव्यापी बँक कर्मचारी संपाच्या पार्श्वभूमीवर केंद्र सरकारने रविवार, २७ सप्टेंबर रोजी सार्वजनिक क्षेत्रातील बँका आणि प्रादेशिक ग्रामीण बँका सुरू ठेवण्याचा निर्णय घेतला आहे. त्यामुळे रविवारी बँकांचे नियमित कामकाज सुरू राहणार आहे.
युनायटेड फोरम ऑफ बँक युनियन्सने २८ ते ३० सप्टेंबरदरम्यान देशव्यापी संपाची हाक दिली आहे. त्यापूर्वी २६ सप्टेंबरला शनिवार आणि २७ सप्टेंबरला रविवारची नियमित सुट्टी असल्याने बँकिंग सेवांवर सलग अनेक दिवस परिणाम होण्याची शक्यता होती. या पार्श्वभूमीवर ग्राहकांच्या अत्यावश्यक बँकिंग गरजा अडथळ्याविना पूर्ण व्हाव्यात, यासाठी रविवारचे कामकाज सुरू ठेवण्याचा निर्णय घेण्यात आला आहे.
अर्थ मंत्रालयाने २३ सप्टेंबर रोजी यासंदर्भात माहिती दिली. सार्वजनिक क्षेत्रातील सर्व बँका तसेच प्रादेशिक ग्रामीण बँका २७ सप्टेंबर रोजी नियमितपणे कार्यरत राहतील, असे मंत्रालयाने स्पष्ट केले आहे. ग्राहकांना संपापूर्वी बँकिंगशी संबंधित महत्त्वाची कामे पूर्ण करता यावीत आणि सलग सुट्ट्या व संपामुळे होणारी गैरसोय कमी व्हावी, हा या निर्णयामागील उद्देश आहे.
दरम्यान, बँक कर्मचारी संघटनांच्या विविध मागण्यांच्या पार्श्वभूमीवर हा प्रस्तावित संप पुकारण्यात आला आहे. पाच दिवसांचा बँकिंग आठवडा लागू करणे, कामगिरीवर आधारित प्रोत्साहनासंदर्भातील बदल, निवृत्तीवेतनाशी संबंधित प्रश्न तसेच निवृत्त कर्मचाऱ्यांसाठी महागाई भत्त्याच्या नियमांमध्ये एकसमानता आणणे, अशा मागण्यांचा त्यात समावेश आहे. जुन्या निवृत्तीवेतन योजनेच्या पुनर्स्थापनेसह वेतन व सेवेशी संबंधित प्रलंबित प्रश्न सोडवण्याची मागणीही संघटनांकडून करण्यात आली आहे.
सरकार आणि बँक व्यवस्थापनाने कर्मचारी संघटनांना प्रस्तावित संप पुढे ढकलण्याचे आवाहन केले आहे. मात्र, संपाबाबतची भूमिका कायम राहिल्यास २८ ते ३० सप्टेंबरदरम्यान बँकिंग सेवांवर परिणाम होण्याची शक्यता आहे. त्यामुळे ग्राहकांनी आपल्या महत्त्वाच्या बँकिंग कामांचे नियोजन त्यानुसार करण्याचे आवाहन करण्यात आले आहे.
