मुंबई प्रतिनिधी
दिवाळीच्या सणानिमित्त मुंबईतील शासकीय कर्मचाऱ्यांसाठी मुख्यमंत्री देवेंद्र फडणवीस यांनी मोठी आनंदाची बातमी दिली आहे. मुंबई शहर आणि मुंबई उपनगर जिल्ह्यातील शासकीय व निमशासकीय कार्यालयांना सोमवार, ९ नोव्हेंबर २०२६ रोजी स्थानिक सुट्टी जाहीर करण्यात आली आहे. त्यामुळे मुंबईतील सरकारी कर्मचाऱ्यांना यंदा दिवाळीत सलग पाच दिवस सुट्ट्यांचा आनंद घेता येणार आहे. राज्य सरकारच्या या निर्णयामुळे दिवाळीसाठी गावी जाणाऱ्या अधिकारी आणि कर्मचाऱ्यांची मोठी सोय होणार आहे.
राज्याच्या सामान्य प्रशासन विभागाने शुक्रवार, ६ नोव्हेंबर रोजी यासंदर्भातील अधिकृत परिपत्रक जारी केले आहे. दिवाळीच्या पार्श्वभूमीवर मंत्रालय अधिकारी संघटनेने मुख्यमंत्री देवेंद्र फडणवीस यांच्याकडे अतिरिक्त स्थानिक सुट्टी देण्याची मागणी केली होती. मुंबईत कार्यरत असलेले अनेक शासकीय अधिकारी आणि कर्मचारी दिवाळीसाठी आपल्या मूळ गावी जातात. मात्र, शनिवार-रविवारच्या सुट्ट्यांनंतर सोमवारी एकाच दिवसासाठी मुंबईत परतणे गैरसोयीचे ठरत होते. रेल्वे आणि एसटीचे आरक्षण मिळवतानाही अडचणी येत होत्या. त्यामुळे ९ नोव्हेंबरला सुट्टी जाहीर करण्याची मागणी करण्यात आली होती. अखेर सरकारने या मागणीला सकारात्मक प्रतिसाद दिला आहे.
नेमके परिपत्रकात काय म्हटले आहे?
शासनाने यापूर्वी गोपाळकाला (दहीहंडी) आणि अनंत चतुर्दशी या सणांसाठी मुंबई शहर व मुंबई उपनगर जिल्ह्यातील शासकीय आणि निमशासकीय कार्यालयांना स्थानिक सुट्ट्या जाहीर केल्या होत्या. आता दिवाळी सणाच्या अनुषंगाने सन २०२६ मधील तिसरी स्थानिक सुट्टी म्हणून सोमवार, ९ नोव्हेंबर हा दिवस घोषित करण्यात आला आहे.
ही सुट्टी मुंबई शहर आणि मुंबई उपनगर जिल्ह्यातील राज्य शासकीय तसेच निमशासकीय कार्यालयांना लागू राहणार आहे. शासनाने ५ नोव्हेंबर १९५८ च्या संबंधित तरतुदींनुसार हा निर्णय घेतला आहे.
सलग पाच दिवस सुट्ट्या कशा?
दिवाळीच्या सुट्ट्यांचे वेळापत्रक पुढीलप्रमाणे आहे.
७ नोव्हेंबर, शनिवार : साप्ताहिक सुट्टी.
८ नोव्हेंबर, रविवार : लक्ष्मीपूजन.
९ नोव्हेंबर, सोमवार : सरकारने जाहीर केलेली स्थानिक सुट्टी.
१० नोव्हेंबर, मंगळवार : दिवाळी बलिप्रतिपदा.
११ नोव्हेंबर, बुधवार : भाऊबीज.
अशा प्रकारे सलग पाच दिवस शासकीय कार्यालये बंद राहणार आहेत. त्यानंतर गुरुवार, १२ नोव्हेंबर आणि शुक्रवार, १३ नोव्हेंबर रोजी कार्यालये नियमितपणे सुरू राहतील. पुढे १४ आणि १५ नोव्हेंबरला पुन्हा शनिवार-रविवारची साप्ताहिक सुट्टी आहे. त्यामुळे १२ आणि १३ नोव्हेंबर रोजी रजा घेतल्यास कर्मचाऱ्यांना सलग नऊ दिवस सुट्टीचा लाभ घेता येऊ शकतो.
काय काय बंद राहणार? कोणाला सुट्टीचा लाभ?
सरकारच्या परिपत्रकानुसार मुंबई शहर आणि मुंबई उपनगर जिल्ह्यातील राज्य शासकीय तसेच निमशासकीय कार्यालये ९ नोव्हेंबर रोजी बंद राहणार आहेत.
मात्र, ही सुट्टी संपूर्ण महाराष्ट्रासाठी लागू नाही. तसेच खासगी कंपन्या, खासगी कार्यालये, दुकाने, मॉल, बँका आणि इतर आस्थापनांना सरसकट सुट्टी जाहीर झालेली नाही. संबंधित संस्थांच्या स्वतंत्र नियमांनुसार त्यांचे कामकाज सुरू राहू शकते. बँकांनाही या स्थानिक सुट्टीचा आपोआप लाभ मिळणार नाही.
कर्मचाऱ्यांसाठी दिवाळीची पर्वणी!
मुंबईत नोकरी करणाऱ्या हजारो शासकीय अधिकारी आणि कर्मचाऱ्यांना दिवाळीच्या काळात आपल्या कुटुंबीयांसोबत सण साजरा करण्यासाठी अधिक वेळ मिळणार आहे. विशेष म्हणजे एका दिवसासाठी मुंबईत परतण्याची कसरतही टळणार आहे. त्यामुळे फडणवीस सरकारच्या या निर्णयाचे शासकीय कर्मचारी वर्गातून स्वागत होत आहे.
अधिकृत परिपत्रक: महाराष्ट्र शासनाच्या संकेतस्थळावर उपलब्ध.
