डोंबिवली प्रतिनिधी :
डोंबिवलीतील महापालिकेच्या शास्त्रीनगर रुग्णालयात डॉक्टर, नर्स आणि कर्मचाऱ्यांना झालेल्या कथित मारहाण प्रकरणात अटक करण्यात आलेले शिवसेनेचे (शिंदे गट) नगरसेवक रमेश म्हात्रे यांना कल्याण जिल्हा व सत्र न्यायालयाने जामीन मंजूर केला आहे. न्यायालयाने ५० हजार रुपयांच्या जातमुचलक्यावर त्यांची सुटका करण्याचे आदेश दिले. म्हात्रे यांच्या वैद्यकीय स्थितीसह अन्य बाबींचा विचार करून हा निर्णय देण्यात आल्याची माहिती समोर आली आहे.
शास्त्रीनगर रुग्णालयातील या घटनेचा सीसीटीव्ही व्हिडीओ समोर आल्यानंतर राज्यभरातून संतापाची लाट उसळली होती. डॉक्टर, नर्स आणि रुग्णालयातील कर्मचाऱ्यांशी कथित गैरवर्तन व मारहाणीच्या घटनेमुळे वैद्यकीय क्षेत्रातून तीव्र प्रतिक्रिया उमटल्या होत्या. संबंधित नगरसेवकावर कठोर कारवाईची मागणी होत असतानाच पोलिसांनी गुन्हा दाखल करून त्यांना अटक केली होती.
सरकारी पक्षाचा जामिनाला विरोध
जामीन अर्जावरील सुनावणीदरम्यान सरकारी पक्षाने न्यायालयात कडाडून विरोध केला. रमेश म्हात्रे यांना जामीन मिळाल्यास ते साक्षीदारांवर दबाव टाकू शकतात तसेच तपासावर परिणाम होण्याची शक्यता असल्याचा युक्तिवाद सरकारी वकिलांनी केला. त्यामुळे जामीन अर्ज फेटाळण्याची मागणी करण्यात आली.
मात्र बचाव पक्षाने म्हात्रे यांची वैद्यकीय परिस्थिती, तपासातील सहकार्य आणि इतर कायदेशीर मुद्दे न्यायालयासमोर मांडले. दोन्ही बाजूंचा युक्तिवाद ऐकल्यानंतर न्यायालयाने अटींसह जामीन मंजूर करण्याचा निर्णय दिला.
सीसीटीव्हीमुळे प्रकरण चर्चेत
या घटनेचा सीसीटीव्ही व्हिडीओ समोर आल्यानंतर प्रकरणाला मोठे वळण मिळाले. व्हिडीओमध्ये रमेश म्हात्रे आणि त्यांच्या समर्थकांकडून रुग्णालय परिसरात गोंधळ घालण्यात आल्याचे दिसून येत असल्याचा दावा करण्यात आला. तसेच वादाच्या दरम्यान एका महिला डॉक्टरच्या हातातील मोबाईल खाली पाडल्याचे दृश्यही व्हिडीओत असल्याची चर्चा आहे. यामुळे वैद्यकीय कर्मचाऱ्यांच्या सुरक्षिततेचा प्रश्न पुन्हा ऐरणीवर आला.
म्हात्रे यांचा बचाव
घटना उघडकीस आल्यानंतर रमेश म्हात्रे यांनी आपल्यावरील आरोप फेटाळले होते. “आम्ही कोणालाही मारहाण केलेली नाही. आमचा तसा कोणताही हेतू नव्हता. आमचे म्हणणे ऐकून घ्यावे, एवढीच आमची भूमिका होती,” असा दावा त्यांनी माध्यमांसमोर केला होता.
अन्य आरोपींच्या जामीन अर्जाकडे लक्ष
या प्रकरणातील इतर तीन आरोपींचे जामीन अर्जही न्यायालयात दाखल होण्याची प्रक्रिया सुरू असून त्यावर लवकरच सुनावणी होणार आहे. रमेश म्हात्रे यांना जामीन मिळाल्यानंतर आता उर्वरित आरोपींनाही दिलासा मिळणार का, याकडे सर्वांचे लक्ष लागले आहे.
वैद्यकीय संघटनांची भूमिका कायम
दरम्यान, डॉक्टर आणि आरोग्य कर्मचाऱ्यांवरील वाढत्या हल्ल्यांच्या पार्श्वभूमीवर या प्रकरणाने पुन्हा एकदा वैद्यकीय कर्मचाऱ्यांच्या सुरक्षेचा मुद्दा ऐरणीवर आणला आहे. दोषींवर कठोर कारवाई व्हावी आणि रुग्णालयांमधील सुरक्षा अधिक मजबूत करण्यात यावी, अशी मागणी विविध वैद्यकीय संघटनांकडून सातत्याने केली जात आहे. आता या प्रकरणातील पुढील न्यायालयीन प्रक्रिया आणि पोलिस तपासाकडे सर्वांचे लक्ष लागले आहे.
