नवी दिल्ली वृत्तसंस्था
पश्चिम बंगालसह देशातील पाच महत्त्वाच्या राज्यांच्या विधानसभा निवडणुकांचे निकाल जाहीर होताच भारतीय जनता पक्षाने तीन राज्यांत उल्लेखनीय यश मिळवले आहे. विशेषतः पश्चिम बंगालमध्ये दोनशेहून अधिक जागांकडे वाटचाल करत भाजपने ऐतिहासिक कामगिरी केल्याचे चित्र स्पष्ट झाले आहे. या पार्श्वभूमीवर पंतप्रधान नरेंद्र मोदी यांनी पक्षाच्या कार्यकर्त्यांना संबोधित करताना राज्यासाठी महत्त्वपूर्ण धोरणात्मक घोषणा केली.
मोदी यांनी आपल्या भाषणात बंगालमध्ये “भयमुक्त वातावरणाची” सुरुवात झाल्याचा दावा करत, हा विजय जनतेच्या परिवर्तनाच्या आकांक्षेचा कौल असल्याचे नमूद केले. “आजपासून बंगालमध्ये नव्या युगाचा प्रारंभ झाला आहे. हा केवळ राजकीय विजय नसून भीती आणि हिंसेच्या राजकारणावर लोकशाहीचा विजय आहे,” असे ते म्हणाले. या विजयाचे श्रेय त्यांनी पक्षाच्या कार्यकर्त्यांना, विशेषतः महिला कार्यकर्त्यांना दिले.
भाजपच्या विजयाला ऐतिहासिक संदर्भ देताना मोदी यांनी शामा प्रसाद मुखर्जी यांचा उल्लेख केला. “आज त्यांच्या आत्म्याला शांती मिळाली असेल,” असे सांगत त्यांनी बंगालमध्ये दीर्घकाळ प्रलंबित असलेल्या राजकीय परिवर्तनाची नोंद घेतली.
पहिल्या कॅबिनेटमध्ये आरोग्य योजनेला मंजुरी
राज्याच्या दृष्टीने सर्वात महत्त्वाची घोषणा करताना मोदी म्हणाले की, सत्तेची सूत्रे हाती घेतल्यानंतर पहिल्याच मंत्रिमंडळ बैठकीत आयुष्यमान भारत योजना लागू करण्याचा निर्णय घेतला जाईल. या योजनेमुळे राज्यातील लाखो नागरिकांना आरोग्य संरक्षणाचा लाभ मिळेल, असे त्यांनी स्पष्ट केले. याशिवाय, घुसखोरीविरोधात कठोर कारवाई केली जाईल, असेही त्यांनी सांगितले.
‘नव्या पहाटेची’ सुरुवात
बंगालच्या सांस्कृतिक वारशाचा उल्लेख करताना मोदी यांनी रविंद्रनाथ टागोर यांना अभिवादन केले. “त्यांच्या स्वप्नातील बंगाल घडवण्याचा आमचा प्रयत्न असेल,” असे ते म्हणाले. रोजगारनिर्मिती, महिला सुरक्षा आणि विकासाला गती देण्याचे आश्वासन त्यांनी दिले.
शांततापूर्ण मतदानाचा उल्लेख
या निवडणुकीत हिंसाचाराचे प्रमाण कमी राहिल्याचा उल्लेख करत, “यावेळी एकाही निर्दोष नागरिकाचा मृत्यू झाला नाही, हे लोकशाहीसाठी सकारात्मक चिन्ह आहे,” असे मोदी यांनी नमूद केले.
सर्व पक्षांना सहकार्याचे आवाहन
राजकीय विरोधकांनाही त्यांनी सहकार्याचे आवाहन केले. “बंगालने परिवर्तनाचा मार्ग स्वीकारला आहे. आता सर्वांनी मिळून राज्याच्या विकासासाठी काम करण्याची गरज आहे,” असे सांगत त्यांनी हिंसामुक्त राजकारणासाठी सर्व पक्षांनी एकत्र येण्याचे आवाहन केले.
भाजपच्या या विजयाने बंगालच्या राजकारणात नवा अध्याय सुरू झाल्याचे मानले जात असून, आगामी काळात केंद्र व राज्य सरकारच्या धोरणांवर राज्याच्या विकासाचा वेग अवलंबून राहणार आहे.
