नवी दिल्ली वृत्तसंस्था
पश्चिम बंगालमध्ये झालेल्या राजकीय सत्तांतरानंतर केंद्र सरकारकडून विकासाभिमुख निर्णयांची मालिका सुरू होण्याचे संकेत पंतप्रधान नरेंद्र मोदी यांनी दिले. भाजपच्या विजयाच्या पार्श्वभूमीवर पक्ष मुख्यालयात कार्यकर्त्यांना संबोधित करताना त्यांनी राज्यातील नव्या सरकारच्या पहिल्याच मंत्रिमंडळ बैठकीत ‘आयुष्मान भारत’ योजनेला मंजुरी देण्याची घोषणा केली. या निर्णयामुळे राज्यातील लाखो नागरिकांना परवडणारी व गुणवत्तापूर्ण आरोग्यसेवा उपलब्ध होण्याची अपेक्षा व्यक्त केली जात आहे.
भाजपने तृणमूल काँग्रेस ला सत्तेबाहेर काढत बंगालमध्ये मोठा राजकीय बदल घडवून आणला आहे. या विजयाला ‘जनतेचा विकासाच्या बाजूने कौल’ असे संबोधत मोदी यांनी राज्याच्या सर्वांगीण प्रगतीसाठी केंद्र आणि राज्य यांच्यात समन्वय साधण्याचा विश्वास व्यक्त केला. “विकास, विश्वास आणि नव्या आशेचा प्रवास आजपासून सुरू होत आहे,”असे ते म्हणाले.
‘आयुष्मान भारत’ योजनेअंतर्गत आर्थिकदृष्ट्या दुर्बल घटकांना मोफत उपचार सुविधा देण्यात येतात. बंगालमध्ये ही योजना लागू झाल्यास ग्रामीण आणि शहरी भागातील आरोग्यव्यवस्थेवर सकारात्मक परिणाम होईल, असे तज्ज्ञांचे मत आहे. आतापर्यंत या योजनेच्या अंमलबजावणीवरून राज्य आणि केंद्रात मतभेद होते.
महिला सुरक्षेला प्राधान्य देण्याबाबतही मोदी यांनी स्पष्ट भूमिका मांडली. “राज्यातील प्रत्येक महिलेला सुरक्षित वातावरण देणे ही सरकारची जबाबदारी असेल,” असे सांगत त्यांनी महिला सक्षमीकरणासाठी विविध उपक्रम राबवण्याचा संकेत दिला. रोजगारनिर्मितीवर भर देत तरुणांसाठी स्थानिक पातळीवर संधी उपलब्ध करून देण्याचे आश्वासनही त्यांनी दिले.
कायदा-सुव्यवस्थेबाबत कठोर भूमिका घेताना सीमावर्ती भागातील घुसखोरी रोखण्यासाठी ठोस उपाययोजना केल्या जातील, असे त्यांनी नमूद केले. “राज्यात शांतता आणि सुरक्षितता प्रस्थापित करण्यासाठी आवश्यक ती सर्व पावले उचलली जातील,” असे ते म्हणाले.
दरम्यान, ‘नारी शक्ती’च्या मुद्द्यावरून विरोधकांवर टीका करताना मोदी यांनी भारतीय राष्ट्रीय काँग्रेस तसेच इतर प्रादेशिक पक्षांवर निशाणा साधला. महिला आरक्षणास विरोध करणाऱ्या पक्षांना जनतेकडून धडा शिकवला जाईल, असा इशाराही त्यांनी दिला.
पुढील निवडणुकांच्या पार्श्वभूमीवर महिला मतदारांची भूमिका निर्णायक ठरणार असल्याचा विश्वास व्यक्त करत त्यांनी देशभरात ‘नारी शक्ती’ ही परिवर्तनाची प्रमुख शक्ती ठरेल, असे अधोरेखित केले.
बंगालमधील सत्तांतरानंतर केंद्र सरकारच्या धोरणात्मक निर्णयांकडे देशाचे लक्ष लागले असून, ‘आयुष्मान भारत’सारख्या योजनांच्या अंमलबजावणीमुळे राज्याच्या सामाजिक-आर्थिक विकासाला गती मिळेल का, याबाबत उत्सुकता व्यक्त होत आहे.
