मुंबई प्रतिनिधी
उन्हाळी सुट्ट्यांच्या पार्श्वभूमीवर राज्यातील एसटी प्रवाशांना आता अधिकचा आर्थिक बोजा सहन करावा लागणार आहे. महाराष्ट्र राज्य मार्ग परिवहन महामंडळ (MSRTC) ने तिकीट दरात १० टक्क्यांची हंगामी वाढ करण्याचा निर्णय घेतला असून ही वाढ १५ एप्रिलपासून लागू होणार आहे. या निर्णयामुळे विशेषतः गावी जाणाऱ्या प्रवाशांना उन्हाळी सुट्टीत एसटी प्रवासासाठी जादा पैसे मोजावे लागणार आहेत.
गर्दीच्या हंगामात दरवाढीचा निर्णय
उन्हाळी सुट्ट्या सुरू होताच राज्यभरातून मोठ्या प्रमाणावर प्रवासी एसटीने गावी किंवा पर्यटनस्थळांकडे जात असतात. या पार्श्वभूमीवर प्रवाशांची वाढती मागणी लक्षात घेऊन एसटी महामंडळाने हंगामी दरवाढ जाहीर केली आहे. ही दरवाढ केवळ १५ एप्रिल ते १५ जून या दोन महिन्यांच्या कालावधीसाठी लागू राहणार आहे.
महामंडळाच्या नियमानुसार गर्दीच्या हंगामात तात्पुरती भाडेवाढ करण्याची तरतूद आहे. याआधीही दिवाळीच्या काळात अशी हंगामी दरवाढ लागू करण्यात आली होती. मात्र त्यानंतर ती रद्द करण्यात आली होती. आता उन्हाळी सुट्ट्यांमुळे वाढलेल्या प्रवासी गर्दीच्या पार्श्वभूमीवर पुन्हा एकदा १० टक्के भाडेवाढ लागू करण्याचा निर्णय घेण्यात आला आहे.
तिकीटासोबत स्वच्छता अधिभार
भाडेवाढीबरोबरच प्रति तिकीट दोन रुपयांचा स्वच्छता अधिभारही आकारला जाणार आहे. त्यामुळे प्रत्येक प्रवासासाठी प्रवाशांना तिकीट दरासोबत अतिरिक्त दोन रुपये मोजावे लागणार आहेत. या निर्णयामुळे विशेषतः लांब पल्ल्याच्या प्रवासात ९० ते १०० रुपयांपर्यंत वाढ होण्याची शक्यता आहे.
लांब पल्ल्याच्या मार्गांवर मोठा परिणाम
हंगामी दरवाढीनंतर अनेक प्रमुख मार्गांवरील तिकीट दर वाढणार आहेत. उदाहरणार्थ, मुंबई ते पुणे या मार्गावर सध्या साध्या एसटीचे तिकीट सुमारे २८२ रुपये आहे. दरवाढीनंतर हे तिकीट ३१२ रुपये होणार असून त्यावर दोन रुपयांचा स्वच्छता अधिभार लावला जाणार आहे. त्यामुळे एकूण तिकीट दर ३१४ रुपयांवर जाणार आहे.
त्याचप्रमाणे मुंबई – नाशिक या मार्गावर सध्याचे ३२३ रुपये तिकीट दर वाढून ३५७ रुपये होणार आहेत. त्यावर स्वच्छता अधिभार मिळून एकूण तिकीट ३५९ रुपये होणार आहे.
कोकणातील प्रवासासाठीही प्रवाशांना अधिक पैसे मोजावे लागणार आहेत. मुंबई ते अलिबाग मार्गावरील तिकीट दर १८२ रुपयांवरून २०२ रुपये होणार असून अधिभारासह एकूण तिकीट २०४ रुपये होईल.
तसेच मुंबई – चिपळूण या मार्गावर सध्याचे ४५३ रुपये तिकीट वाढून ५०० रुपये होणार आहे. अधिभारासह एकूण तिकीट ५०२ रुपये होणार आहे.
मुंबई – रत्नागिरी मार्गावरील प्रवासही महागणार असून सध्याचे ६०४ रुपये तिकीट वाढून ६६६ रुपये होणार आहे. त्यावर दोन रुपयांचा अधिभार लावल्यामुळे एकूण तिकीट ६६८ रुपये होणार आहे.
या गाड्यांना दरवाढ लागू नाही
एसटी महामंडळाने स्पष्ट केले आहे की ही दरवाढ केवळ साध्या बसगाड्यांसाठी लागू राहणार आहे. प्रीमियम सेवा म्हणून ओळखल्या जाणाऱ्या शिवनेरी बस सेवा, शिवशाही बस सेवा, हिरकणी बस सेवा, जनशिवनेरी बस सेवा तसेच शयनयान गाड्या आणि ई-बस सेवांना या दरवाढीतून वगळण्यात आले आहे.
प्रवाशांमध्ये नाराजीची भावना
उन्हाळी सुट्टीत हजारो विद्यार्थी, कामगार आणि नोकरदार मंडळी गावी जात असतात. अशा वेळी अचानक जाहीर झालेल्या या भाडेवाढीमुळे प्रवाशांमध्ये नाराजी व्यक्त होत आहे. मात्र एसटी प्रशासनाच्या मते, वाढलेले इंधन खर्च, देखभाल खर्च आणि वाढलेली प्रवासी मागणी लक्षात घेऊन ही तात्पुरती वाढ आवश्यक असल्याचे सांगण्यात येत आहे.
