मुंबई प्रतिनिधी
कविश्रेष्ठ वि. वा. शिरवाडकर (कुसुमाग्रज) यांच्या जयंतीनिमित्त साजरा होणारा मराठी भाषा गौरव दिन गुरुवारी विधान भवनात साहित्यिक आणि सांस्कृतिक कार्यक्रमांनी उत्साहात पार पडला. महाराष्ट्र विधानमंडळ सचिवालयातर्फे आयोजित ‘जावे विनोदाच्या गावा’ या विशेष कार्यक्रमात अभिजात मराठी विनोदी साहित्याचे अभिवाचन, संवाद आणि लोकसांस्कृतिक सादरीकरणांनी उपस्थितांना समृद्ध अनुभव दिला. यावेळी वि. स. पागे संसदीय प्रशिक्षण केंद्रातर्फे संपादित ‘लोकसेवेचा लोकजागर’ या ग्रंथाचे प्रकाशन मुख्यमंत्री देवेंद्र फडणवीस यांच्या हस्ते झाले.
मान्यवरांची उपस्थिती
कार्यक्रमाला उपमुख्यमंत्री एकनाथ शिंदे, उपमुख्यमंत्री सुनेत्रा अजित पवार, विधान परिषद सभापती राम शिंदे, विधानसभा अध्यक्ष राहुल नार्वेकर, उपसभापती नीलम गोऱ्हे, संसदीय कार्यमंत्री चंद्रकांत पाटील, मराठी भाषा मंत्री उदय सामंत, सांस्कृतिक मंत्री आशिष शेलार आदी उपस्थित होते.
“मराठीला ज्ञानभाषेचे स्थान मिळाले पाहिजे”
मराठी ही केवळ व्यवहाराची नव्हे तर ज्ञाननिर्मितीची भाषा म्हणून पुढे आली पाहिजे, असे प्रतिपादन मुख्यमंत्री फडणवीस यांनी केले. छत्रपती शिवाजी महाराज यांनी प्रमाण भाषेचा आग्रह धरला, तर पंतप्रधान नरेंद्र मोदी यांनी मराठीला अभिजात दर्जा बहाल करून तिच्या गौरवाला अधोरेखित केले, असे ते म्हणाले. भाषेचा गोडवा टिकवून तिचे साहित्य समाजाच्या सर्व स्तरांपर्यंत पोहोचवणे आवश्यक असल्याचे त्यांनी नमूद केले.
“माय मराठीचे वैभव जपूया”
मराठीला हजारो वर्षांची परंपरा लाभली असून विविध बोलींमुळे तिची समृद्धी अधिक वृद्धिंगत झाली आहे, असे उपमुख्यमंत्री शिंदे म्हणाले. विनोदी साहित्यातील दोन शिखरे म्हणजे प्रल्हाद केशव अत्रे आणि पु. ल. देशपांडे होत, असे त्यांनी नमूद केले. अभिजात दर्जा टिकविणे ही सर्वांची सामूहिक जबाबदारी असल्याचे त्यांनी अधोरेखित केले.
शासनाचा मराठी संवर्धनावर भर
प्रशासन, शिक्षण आणि तंत्रज्ञान क्षेत्रात मराठीचा वापर वाढविण्यासाठी शासन कटिबद्ध आहे, असे उपमुख्यमंत्री सुनेत्रा पवार यांनी सांगितले. मराठी भाषा संवर्धनासाठी राबविण्यात येणाऱ्या विविध उपक्रमांची माहिती त्यांनी यावेळी दिली.
अभिजात दर्जासाठी पाठपुरावा
मराठीला अभिजात भाषेचा दर्जा मिळवून देण्यासाठी राज्य सरकारने सातत्याने प्रयत्न केले, असे उपसभापती नीलम गोऱ्हे यांनी नमूद केले. पंतप्रधान मोदी आणि केंद्र सरकारचे त्यांनी आभार मानले. तंत्रज्ञान युगात मराठी शिक्षणाचे जतन करणे ही सर्वांची जबाबदारी असल्याचे विधानसभा अध्यक्ष नार्वेकर यांनी सांगितले.
साहित्यिक मेजवानीने रंगली संध्याकाळ
कार्यक्रमाची सुरुवात ‘लाभले आम्हास भाग्य बोलतो मराठी’ या गीताने झाली. ऋषिकेश जोशी यांनी पु. ल. देशपांडे यांच्या ‘माझा शत्रूपक्ष’ या लेखाचे, तर केदार शिंदे यांनी जयवंत दळवी यांच्या ‘जगी हा खास वेड्यांचा पसारा’ या लेखाचे अभिवाचन केले. विंदा करंदीकर यांच्या निवडक कवितांचे सादरीकरणही झाले.
‘आचार्य अत्रे व पु. ल. देशपांडे : विनोदाची दोन शिखरे’ या विषयावर मिलिंद जोशी यांनी संवाद साधला. लोकगीतांच्या सादरीकरणाने कार्यक्रमाची सांगता झाली. मराठी भाषेच्या सांस्कृतिक वैभवाला उजाळा देणारा हा उपक्रम ठरल्याची भावना मान्यवरांनी व्यक्त केली. मराठीला ज्ञानभाषा म्हणून प्रतिष्ठा मिळवून देण्यासाठी समाजातील सर्व घटकांनी एकत्रित प्रयत्न करावेत, असे आवाहनही यावेळी करण्यात आले.
