बीड प्रतिनिधी
पहिल्या टप्प्यातील नगरपालिकांच्या निवडणुकांना मतदारांनी कौल दिला असला, तरी मतमोजणीला अजून तब्बल १६ दिवसांची वाट पाहावी लागणार आहे. याच काळात ईव्हीएमची सुरक्षा हा मुद्दा जिल्हा प्रशासनासमोर मोठे आव्हान ठरला आहे. परळी नगरपालिकेत तर या सुरक्षेवर उमेदवाराचे पतीच अविश्वास व्यक्त करीत ‘स्ट्राँग रूम’जवळच मुक्काम करण्याची मागणी पुढे सरसावली आहे.
राष्ट्रवादी काँग्रेस (शरद पवार गट)च्या नगराध्यक्षपदाच्या उमेदवार संध्या देशमुख यांचे पती दीपक देशमुख यांनी ईव्हीएम सुरक्षेवर प्रशासनाचे आश्वासन न पुरेसे म्हटले आहे. “आमचं भविष्य या स्ट्राँग रूममध्ये आहे. त्यामुळे त्याच्याजवळ बसूनच पहारा देणार,” असा त्यांचा आग्रह आहे. थेट अंथरूण-पांघरूण घेऊनच स्ट्राँग रूमच्या परिसरात मुक्काम करण्याची परवानगी त्यांनी बीड प्रशासनाकडे मागितली आहे.
उच्च न्यायालयाच्या आदेशानुसार मतमोजणी २१ डिसेंबर रोजीच होणार असल्याने काळाचा विलंब अपरिहार्य आहे. मात्र, या दीर्घ प्रतीक्षेत ईव्हीएमची सुरक्षितता धोक्यात येऊ नये, याची उमेदवार आणि कार्यकर्त्यांना मोठी धाकधूक आहे. परळीतील राजकीय वातावरण तापवणाऱ्या या निवडणुकीत देशमुख यांचा ‘स्ट्राँग रूम पहारा’ हा नवीनच वळण ठरत आहे.
देशमुख म्हणाले, “आम्हाला इथंच २४ तास राहण्याची मुभा द्या. जाण्या-येण्यात वेळ आणि ऊर्जा खर्च होते. आमचे पाच उमेदवार अजूनही रिंगणात असून त्यांचा प्रचारदेखील मला करायचा आहे. या सगळ्यात स्ट्राँग रूमची राखण करणे ही आमची जबाबदारी आहे.”
प्रशासनाने स्ट्राँग रूमला कडेकोट पोलिस बंदोबस्त दिल्याचे सांगितले असले, तरी उमेदवारांचे कार्यकर्ते थेट परिसरात मुक्कामाची मागणी करत असल्याने प्रशासनही दुविधेत आहे.
परळीतील निवडणुकीचा हा अनोखा अध्याय, ईव्हीएमवरील अविश्वासाचा सूर आणि उमेदवारांच्या धास्तीचे चित्र, आगामी मतमोजणीकडे सर्वांचेच लक्ष वळवून ठेवणारे ठरत आहे.
