कराड प्रतिनिधी
सातारा जिल्हा बँक आणि बाजार समितीच्या निवडणुकांत झालेल्या कडव्या संघर्षानंतर पूर्णपणे वेगळ्या दिशेने निघालेले पाटील आणि उंडाळकर हे दोन गट… आता कऱ्हाड नगरपालिका निवडणुकीच्या पार्श्वभूमीवर पुन्हा एकत्र येताना दिसत आहेत. चार वर्षांपूर्वीची भळभळती जखम, पराजय-विजयाची कटुता आणि परस्परांतील तुटलेला संवाद… या सर्वांना या निवडणुकीने जणू मागे ढकलले आहे.
जिल्हा बँक निवडणुकीत फूट… आणि चार वर्षांचे दुरावलेपण
सातारा जिल्हा बँकेची निवडणूक कऱ्हाडच्या राजकारणातील निर्णायक वळण मानली जाते. माजी सहकारमंत्री बाळासाहेब पाटील आणि आमदार डॉ. अतुल भोसले एका बाजूला, तर ॲड. उदयसिंह पाटील-उंडाळकर दुसऱ्या बाजूला असे समीकरण उभे राहिले. या निवडणुकीत पाटील यांनी विजय मिळवला आणि इथूनच दोन परंपरागत प्रभावी घराण्यांमध्ये दरी वाढत गेली.
यानंतर बाजार समितीच्या निवडणुकीतही भोसले-पाटील यांनी उंडाळकरांविरोधात पॅनेल उभे केले. माजी मुख्यमंत्री प्रथमच मैदानात उतरले आणि उंडाळकरांना साथ दिली. त्या लढतीत उंडाळकर गट विजयी झाला, परंतु दोन्ही गटांतील मतभेद आणखी तीव्र झाले. विधानसभेपर्यंत हे समीकरण कायम राहिल्याने दोन्ही बाजू एकमेकांपासून अधिकच दूर गेल्या.
नगरपालिका निवडणूक ठरली ‘टर्निंग पॉइंट’
नगरपालिका निवडणुकीत घडामोडींनी वेग घेतला. आमदार डॉ. भोसले यांनी माजी मुख्यमंत्री चव्हाण, माजी मंत्री पाटील आणि यशवंत विकास आघाडीप्रमुख राजेंद्र यादव यांच्या समर्थक असलेल्या माजी नगरसेवकांना भाजपमध्ये दाखल करून नवा राजकीय स्फोट घडवला. यानंतर पाटील आणि यादव हे भाजपविरोधात एकत्र आले. लोकशाही आघाडी आणि यशवंत विकास आघाडी यांची संयुक्त मोहीम उभी राहिली.
या दोन्ही आघाड्यांच्या प्रचाराचा प्रारंभ दत्त चौकातून झाला. पालकमंत्री शंभूराज देसाई, माजी मंत्री पाटील, यादव, कार्यकर्ते, पदाधिकारी मोठ्या संख्येने सहभागी झाले.
चावडी चौकातील दृश्य ठरलं चर्चेचा विषय
रॅली चावडी चौकात पोहोचताच एक दृश्य साऱ्यांचे लक्ष वेधून घेत गेले
उघड्या जीपमध्ये एकत्र उभे असलेले पालकमंत्री देसाई, माजी मंत्री पाटील, राजेंद्र यादव… आणि त्यांच्यासोबत ॲड. उदयसिंह पाटील-उंडाळकर!
चार वर्षांत प्रथमच दोन्ही गटांचे प्रमुख नेते एका मंचावर दिसले. प्रतिस्पर्ध्यांशी असलेल्या कडव्या संघर्षानंतरही निवडणुकीच्या निमित्ताने ‘एकत्र’ आलेले हे दृश्य कऱ्हाडच्या राजकारणात मोठी उलथापालथ घडवणारे ठरल्याची चर्चा आहे.
कऱ्हाडच्या राजकारणातील परंपरा… आणि बदललेलेच समीकरण
कऱ्हाड तालुक्यात माजी मंत्री (कै.) विलासराव पाटील-उंडाळकर आणि ज्येष्ठ नेते (कै.) पी. डी. पाटील यांनी दीर्घकाळ राजकारणात एकमेकांना साथ देत प्रभाव टिकवला. पंचायत समिती, जिल्हा बँक, सहकार संस्था,सर्वत्र या दोन घराण्यांचा दबदबा होता. मात्र जिल्हा बँकेच्या निवडणुकीनंतर समीकरणे कोलमडून पडली होती.
उंडाळकरांनी सोसायटी गटातून अर्ज दाखल केल्यानंतर त्याच गटातून माजी मंत्री पाटील यांना उमेदवारी देण्यात आल्याने संघर्ष अपरिहार्य ठरला. हा संघर्ष आता चकमकीतून मैत्रीत रुपांतरित होत असल्याचे चित्र दिसत आहे.
