कराड प्रतिनिधी
कोकण सहलीवरून नाशिककडे परतणाऱ्या विद्यार्थ्यांच्या खासगी बसला आज पहाटे कराड तालुक्यात अपघात झाला. वाटार गावाजवळ पुणे–बेंगलूर महामार्गावर झालेल्या या दुर्घटनेत ३० ते ३२ विद्यार्थी जखमी झाले असून एका विद्यार्थ्याची प्रकृती चिंताजनक आहे, अशी माहिती पोलिसांनी दिली.
पिंपळगाव (जि. नाशिक) येथील विद्यार्थ्यांचा सहल गट कोकणात फिरून परतत होता. रात्री उशिरा निघालेली बस पहाटे वाटार गावाच्या हद्दीत पोहोचताच चालकाचा रस्त्यावरील अंदाज चुकला. महामार्गालगत सुरू असलेल्या रस्त्याच्या कामामुळे कडेला खोल उतार असल्याने बस घसरून खाली कोसळली. सुदैवाने बसमध्ये अडकून पडलेल्यांना त्वरित बाहेर काढण्यात आल्याने मोठा अनर्थ टळला.
अपघाताची माहिती मिळताच कराड तालुका पोलीस ठाण्याचे निरीक्षक महेंद्र जगताप यांच्यासह पोलिस पथकाने घटनास्थळी धाव घेतली. जखमी विद्यार्थ्यांना तातडीने कराड येथील विविध रुग्णालयांत दाखल करून उपचार सुरू करण्यात आले आहेत. गंभीर जखमी विद्यार्थ्यांवर विशेष वैद्यकीय देखरेखीखाली उपचार सुरू आहेत.
घटनास्थळी पाहणी करून पुढील तपास सुरू असल्याचे पोलिसांनी सांगितले.
