स्वप्‍नील गाडे| रिपोर्टर
वि.प. मार्ग पोलिसांनी खून करून फरार झालेल्या सुरज संजय मंडल या आरोपीला अवघ्या ४८ तासांत बिहारमधून ताब्यात घेण्यात मोठे यश मिळवले आहे. १७ नोव्हेंबर रोजी सकाळी ७ वाजता उघडकीस आलेल्या या प्रकरणात कार्यालयात काम करणाऱ्या रमेश हजाजी चौधरी (२९) याचा लाकडी स्टूल, फायर एक्स्टिंग्विशर आणि नायलॉन दोरीच्या सहाय्याने खून करण्यात आल्याची तक्रार फिर्यादी धवल मुकेश संघवी यांनी पोलिसांकडे नोंदवली होती. या आधारावर वि.प. मार्ग पोलीस ठाण्यात गु.र.क्र. १६३९/२०२५, कलम १०३(१) भा.न्या.सं. अंतर्गत गुन्हा दाखल झाला.
घटनास्थळाजवळील खासगी व शासकीय सीसीटीव्ही फुटेज तपासल्यावर आरोपी मंडल हा टॅक्सीने कुर्ल्याकडे गेल्याचे आढळले. त्यानंतर त्याचा मोबाईल लोकेशन एलटीटी परिसरात आढळल्याने तो बिहारला पळाल्याची शक्यता पोलिसांनी व्यक्त केली. पोउपनि श्यामराव वाटसर यांच्या पथकाने तत्काळ बिहारमध्ये धाव घेत शोधमोहिम राबविली; मात्र सुरुवातीला तो हाती लागला नाही.
१९ नोव्हेंबर रोजी आरोपीचा मोबाईल पुन्हा सक्रिय झाल्यानंतर त्याचे लोकेशन पटना येथे असल्याचे निष्पन्न झाले. गर्दीच्या भागात शोधमोहीम राबवित असताना पटना रेल्वे स्टेशनजवळील खगौल रोड परिसरात आरोपीसारखा इसम दिसला. संशयिताच्या हालचाली निरीक्षणात घेतल्यानंतर तोच सुरज मंडल असल्याचे स्पष्ट झाले. ताब्यात घेण्याचा प्रयत्न करताच तो पळू लागला; मात्र आवश्यक बळाचा वापर करून त्याला पकडण्यात आले.
ताब्यात घेतल्यानंतर त्याला गर्दनीबाग पोलीस ठाणे, पटना येथे हजर करण्यात आले आणि त्यानंतर मुंबई पोलिसांनी त्याला अटक केली.
ही संपूर्ण कामगिरी अप्पर पोलीस आयुक्त (द.प्रा.वि.) डॉ. अभिनव देशमुख, पोलीस उपायुक्त परिमंडळ ०२ डॉ. मोहित कुमार गर्ग, सपोआ ज्ञानेश्वर वाघ, वपोनि भारत पाटील, पोनि (गुन्हे) संभाजी गुरव, पोनि विनित कदम, पोनि गायकवाड यांच्या मार्गदर्शनाखाली; तसेच प्रत्यक्ष तपास व अंमलबजावणी पोलीस अधिकारी,सपोनि विशाल गायकवाड, सपोनि विकास राऊत, पोउपनि श्यामराव वाटसर, एटीसी अधिकारी पोउपनि ढोरकुळे, स.फौ. सकपाळ,
मोपारी,तोडणकर,नागरे,व्यवहारे,गांगड, आंबिलवाड, कांडेकर;तसेच लो.टि.मार्ग पो.ठाणेचे गुन्हे प्रकटीकरण अधिकारी सपोनि कांबळे व पथक, गावदेवी पो.ठाणेचे पोउपनि अनिकेत शेडगे व पथक, पायधुनी पो.ठाण्याचे सपोनि शेख व पोउपनि वायाळ पथक, डॉ. दाभोळकर मार्ग पो.ठाण्याचे सपोनि पवार व पथक; आणि तांत्रिक सहाय्य पो शि गणेश जगदेव यांच्या संयुक्त प्रयत्नातून उलगडली.
