बुलढाणा प्रतिनिधी
मुंबईवरून घराकडे परतत असताना कसारा घाटात झालेल्या दुर्दैवी अपघातात काँग्रेसचे ज्येष्ठ नेते, चिखली तालुका काँग्रेसचे माजी अध्यक्ष आणि चिखली कृषी उत्पन्न बाजार समितीचे माजी सभापती डॉ. सत्येंद्र भुसारी (वय ५८) यांचे निधन झाले. रेल्वेतून पडल्याने झालेल्या गंभीर दुखापतीतून उपचारादरम्यान त्यांचा मृत्यू झाला. या घटनेने चिखली तालुका काँग्रेससह संपूर्ण राजकीय वर्तुळात शोककळा पसरली आहे.
मिळालेल्या माहितीनुसार, डॉ. भुसारी काही कामानिमित्त मुंबईला गेले होते. काम आटोपून ते बुधवारी रात्री उशिरा रेल्वेने चिखलीकडे परतत होते. मात्र कसारा घाटात प्रवासादरम्यान ते रेल्वेतून पडले. त्यांना तातडीने नाशिक येथील रुग्णालयात उपचारासाठी दाखल करण्यात आले. परंतु उपचार सुरू असताना त्यांनी अखेरचा श्वास घेतला.
काँग्रेसला मोठा धक्का
डॉ. भुसारी यांच्या अकस्मात निधनाने चिखली तालुक्यातील काँग्रेसला मोठा धक्का बसला आहे. स्थानिक स्वराज्य संस्थांच्या निवडणुकीच्या पार्श्वभूमीवर पक्षासाठी ही मोठी पोकळी निर्माण झाली आहे. दोन दिवसांपूर्वीच त्यांनी छत्रपती संभाजीनगर जिल्ह्यात काँग्रेसच्या निरीक्षक म्हणून संभाव्य उमेदवारांशी बैठक घेतली होती. आगामी जिल्हा परिषद निवडणुकीत इसोली गटातून उमेदवारीसाठी त्यांची नावं आघाडीवर होती.
सक्रिय व जनसंपर्क जपणारे नेते
डॉ. भुसारी हे केवळ राजकारणातच नव्हे तर सामाजिक क्षेत्रातही सक्रिय होते. आपल्या साध्या, समंजस स्वभावामुळे ते सर्वपक्षीय कार्यकर्त्यांमध्ये लोकप्रिय होते. चिखली कृषी उत्पन्न बाजार समितीचे सभापती म्हणून त्यांनी बाजार समितीच्या कामकाजात पारदर्शकता आणि शेतकऱ्यांच्या हितासाठी उपयुक्त निर्णय घेतले होते.
‘भला माणूस, आपला माणूस’ कार्यकर्त्यांची भावना
डॉ. भुसारी हे चिखलीतील गांधीनगर येथे वास्तव्यास होते. मूळचे भोरसा (ता. चिखली) येथील असलेले भुसारी यांनी तालुक्यात दांडगा जनसंपर्क निर्माण केला होता. त्यांच्या निधनानंतर ‘भला माणूस, आपला माणूस गेला’ अशी भावना कार्यकर्त्यांतून व्यक्त होत आहे.
शोकसंदेश
डॉ. भुसारी यांच्या निधनानंतर काँग्रेसचे जिल्हाध्यक्ष, स्थानिक नेते, पदाधिकारी तसेच विविध पक्षांच्या प्रतिनिधींनी त्यांच्या परिवाराला भेट देऊन शोक व्यक्त केला. चिखली तालुक्यात सर्वत्र हळहळ व्यक्त होत असून सामाजिक, राजकीय वर्तुळात दुःखाची छाया पसरली आहे.
