सातारा प्रतिनिधी
राज्याचे सार्वजनिक बांधकाम मंत्री शिवेंद्रसिंहराजे भोसले यांना भारतीय जनता पक्षाने आगामी स्थानिक स्वराज्य संस्थांच्या निवडणुकांसाठी ‘स्टार प्रचारक’ म्हणून मान्यता दिली आहे. राज्यभरातील 242 नगरपालिकांमधील प्रचारसभांसाठी त्यांना निमंत्रित करण्यात येणार असून, पक्षात त्यांच्या वाढत्या प्रभावाची यावरून प्रचिती आली आहे.
सध्या शिवेंद्रसिंहराजे हे सातारा जिल्ह्यातील स्थानिक स्वराज्य संस्था निवडणुकांचे भाजप प्रभारी म्हणून काम पाहत आहेत. गेल्या काही वर्षांत पक्षशिस्तीचे पालन, संघटन कौशल्य, कार्यकारिणी बैठकीत सक्रिय सहभाग आणि कार्यक्रमांची काटेकोर अंमलबजावणी या गुणांमुळे त्यांनी पक्षाच्या वरिष्ठ नेतृत्वाचा विश्वास संपादन केला आहे.
लोकसभा निवडणुकीत खासदार उदयनराजे भोसले यांच्या प्रचारात त्यांनी दाखवलेली राजकीय मुत्सद्देगिरी आणि संघटन क्षमता पक्षश्रेष्ठींनी लक्षात घेतली. त्यानंतरच आगामी नगरपालिका निवडणुकांमध्ये त्यांना स्टार प्रचारक म्हणून जबाबदारी देण्यात आली आहे.
मुंबईत नुकत्याच पार पडलेल्या भाजपच्या प्रदेश बैठकीत हा निर्णय घेण्यात आला. बैठकीला प्रदेशाध्यक्ष रवींद्र चव्हाण, मुख्यमंत्री देवेंद्र फडणवीस, केंद्रीय मंत्री नितीन गडकरी, महसूल मंत्री चंद्रशेखर बावनकुळे, विनोद तावडे आदी नेते उपस्थित होते. या बैठकीत शिवेंद्रसिंहराजेंच्या नावावर सर्वानुमते शिक्कामोर्तब झाले.
राज्यातील विविध नगरपालिका व महापालिकांच्या निवडणुकांमध्ये पक्षाची घोडदौड कायम ठेवण्यासाठी शिवेंद्रसिंहराजेंना महत्त्वाची भूमिका बजावावी लागणार आहे. विशेषतः सातारा जिल्ह्यातील दहा स्थानिक स्वराज्य संस्थांच्या निवडणुकांत भाजपला मजबूत स्थान मिळवून देण्याची जबाबदारी त्यांच्यावर सोपविण्यात आली आहे.
भाजपमध्ये त्यांच्या सक्रियतेमुळे सातारा जिल्हा राजकारणात नवे समीकरण घडण्याची चिन्हे दिसत असून, या पार्श्वभूमीवर शिवेंद्रसिंहराजे यांच्या प्रचार मोहिमा विशेष लक्षवेधी ठरण्याची शक्यता वर्तवली जात आहे.
