मुंबई प्रतिनिधी
मुंबईकरांच्या दैनंदिन जीवनरेषा असलेल्या उपनगरी रेल्वेवर आज (शनिवार) मध्यरात्रीपासून मोठ्या प्रमाणावर मेगाब्लॉक होणार आहे. मध्य रेल्वेच्या मेन लाईनसह पश्चिम रेल्वेवर देखभाल व दुरुस्तीची कामे करण्यात येणार असून, यामुळे अनेक गाडय़ांच्या फेऱ्या रद्द होणार आहेत तर काहींच्या मार्गात बदल करण्यात येणार आहे.
पश्चिम रेल्वेवर माहीम ते सांताक्रुझदरम्यान अप व डाऊन धीम्या मार्गांवर शनिवारी रात्री १ वाजेपासून पहाटे ४.३० पर्यंत जम्बो ब्लॉक घेण्यात येणार आहे. या काळात ट्रॅक, सिग्नलिंग सिस्टम व ओव्हरहेड उपकरणांच्या देखभालीची कामे होणार असून, मुंबई सेंट्रल ते सांताक्रुझदरम्यान सर्व डाऊन धीम्या मार्गावरील गाडय़ा जलद मार्गावर वळवण्यात येणार आहेत.
दरम्यान, मध्य रेल्वेच्या भायखळा स्थानकावर डीएसएस पॉइंट बदलण्यासाठी विशेष ट्रॅफिक ब्लॉक घेतला जाणार आहे. हा ब्लॉक शनिवार रात्री १२.३० ते पहाटे ४.३० पर्यंत राहणार असून, कोणार्क एक्स्प्रेस आणि हावडा,छत्रपती शिवाजी महाराज टर्मिनस एक्स्प्रेस या गाडय़ा दादर येथेच शॉर्ट टर्मिनेट करण्यात येणार आहेत.
या ब्लॉकमुळे उपनगरी प्रवाशांसह लांब पल्ल्याच्या प्रवाशांची गैरसोय होण्याची शक्यता असून, रेल्वे प्रशासनाने प्रवाशांना पर्यायी प्रवासाची तयारी ठेवण्याचे आवाहन केले आहे.
