ठाणे प्रतिनिधी
नवी मुंबई : उलवे परिसरात एका ३९ वर्षीय व्यक्तीकडून तरुणीवर सात महिन्यांपर्यंत अत्याचार केल्याची खळबळजनक घटना उघडकीस आली आहे. लग्नाचे आमिष दाखवून शारीरिक संबंध, शिवीगाळ, मारहाण, तसेच जबरदस्तीने गर्भपात करवून घेतल्याप्रकरणी उलवे पोलिसांनी विशेष गयाप्रसाद वरुण (रा. कानपूर, उत्तर प्रदेश) याच्याविरुद्ध गंभीर स्वरूपाचा गुन्हा दाखल केला आहे.
पोलिसांनी दिलेल्या माहितीनुसार, आरोपी विशेष वरुण याने १ जानेवारी २०२५ ते २९ जुलै २०२५ या कालावधीत उलवे सेक्टर १८ येथील फ्लॅटमध्ये तरुणीला वारंवार बोलावून घेतले. तिला लग्नाचे आश्वासन देत शारीरिक संबंध ठेवले. या दरम्यान तिच्यावर मानसिक व शारीरिक छळ होत राहिला. तरुणी गर्भवती राहिल्यानंतरही आरोपीने तिची परवानगी न घेता जबरदस्तीने गर्भपात घडवून आणला. इतकेच नव्हे तर पोलिसांत तक्रार दिल्यास जीवे मारण्याची धमकीही दिल्याचे तिने आपल्या फिर्यादीत नमूद केले आहे.
या प्रकरणी उलवे पोलीस ठाण्यात गुन्हा दाखल करण्यात आला असून, तपास वरिष्ठ पोलीस निरीक्षक अर्जुन रजाने आणि पोलीस निरीक्षक (गुन्हे) अश्विनी पाटील यांच्या मार्गदर्शनाखाली सुरू आहे.
