स्वप्‍नील गाडे| रिपोर्टर
मुंबई |ॲन्टॉप हिल परिसरात घडलेल्या एका तीन वर्षांच्या मुलीच्या अपहरणानंतर तिचा खून झाल्याच्या अत्यंत गंभीर प्रकरणात अवघ्या १२ तासांत पोलिसांनी आरोपीला अटक केली आहे. या कारवाईमुळे पोलीस दलाच्या कार्यक्षमतेवर पुन्हा एकदा शिक्कामोर्तब झाले आहे.
दिनांक १५ जुलै २०२५ रोजी पहाटे ००:४५ वाजता नाजीय शेख (वय ४०) यांनी आपल्या तीन वर्षे ११ महिन्यांच्या मुलीच्या अपहरणाबाबत ॲन्टॉप हिल पोलीस ठाण्यात तक्रार दिली होती. अज्ञात व्यक्तीने १४ जुलै रोजी रात्री ८ वाजता ते १५ जुलै रोजी १२.१० वाजेच्या दरम्यान मुलीला फूस लावून पळवले होते. याप्रकरणी पोलिसांनी भारतीय न्याय संहितेच्या कलम १३७(२) अंतर्गत गुन्हा दाखल केला.
दरम्यान, कुलाबा पोलीस हद्दीत एका अज्ञात बालिकेचा मृतदेह आढळून आल्याचे पोलिसांना कळताच तपास अधिक वेगाने सुरू करण्यात आला. मृत मुलगी हीच अपहृत बालिका असल्याचे निष्पन्न झाल्यानंतर गुन्ह्यात भारतीय न्याय संहितेच्या कलम १०३, १४०(२), २३८ आणि बाल न्याय (मुलांची काळजी आणि संरक्षण) अधिनियम २०१५ अंतर्गत कलम ७५ यांची भर करण्यात आली.
गुन्ह्याचे गांभीर्य लक्षात घेता वरिष्ठ अधिकाऱ्यांच्या मार्गदर्शनाखाली एकूण १० पथके तयार करण्यात आली. तपासात तब्बल १६२ सीसीटीव्ही फुटेजचे विश्लेषण करण्यात आले. आरोपी सतत आपले ठिकाण बदलत होता; मात्र तांत्रिक तपासाद्वारे त्याचा माग काढण्यात आला. अखेर आरोपी लोअर परळ येथील वरळी नाका बस स्थानकावरून पळून जाण्याच्या प्रयत्नात असताना त्याला शिताफीने अटक करण्यात आली.
तपासादरम्यान आरोपीने कबुली दिली की, मृत मुलगी ही त्याच्या वैयक्तिक आयुष्यात अडथळा ठरत असल्याने रागाच्या भरात तिचे अपहरण करून, भाऊचा धक्का परिसरात तिची गळा आवळून हत्या केली आणि पुरावे नष्ट करण्याच्या उद्देशाने मृतदेह समुद्रात फेकून दिला.
ही कारवाई मा. पोलीस आयुक्त देवेन भारती, सह आयुक्त (कायदा व सुव्यवस्था) सत्यनारायण चौधरी, अप्पर पोलीस आयुक्त विक्रम देशमाने, पोलीस उपायुक्त श्रीमती रागसुधा आर., सहायक पोलीस आयुक्त शैलेंद्र धिवार यांच्या मार्गदर्शनाखाली पार पडली.
या गुन्ह्याच्या तपासात व.पो.नि. केशवकुमार कसार, पो.नि. गोपाळ भोसले, पो.नि. किशोरकुमार राजपूत यांच्यासह अनेक अधिकारी व कर्मचाऱ्यांचा सक्रिय सहभाग होता. तांत्रिक तपास, सीसीटीव्ही विश्लेषण आणि वेळेवर घेतलेल्या कारवाईमुळे ही घटना काही तासांत उघडकीस आली.
या यशस्वी कारवाईबद्दल पोलिसांचे सर्वत्र कौतुक होत आहे.
