मालेगाव प्रतिनिधी
मालेगाव तालुक्यातील लखाने गावच्या शिवारात पत्र्याच्या शेडमध्ये बेकायदेशीरपणे सुरू असलेल्या देशी व विदेशी बनावट मद्यनिर्मितीच्या कारखान्यावर राज्य उत्पादन शुल्क विभागाच्या पथकाने आज (१३ जून) छापा टाकून मोठी कारवाई केली. या कारवाईत १४ लाख ५१ हजार २४० रुपयांचा मुद्देमाल जप्त करण्यात आला असून, या प्रकरणी अज्ञात व्यक्तींसह अनेकांविरोधात गुन्हा दाखल करण्यात आला आहे.
राज्य उत्पादन शुल्क विभागाला लखाने शिवारात अवैधरित्या मद्यनिर्मिती सुरू असल्याची गोपनीय माहिती मिळाल्यानंतर मालेगाव विभागाचे निरीक्षक लीलाधर पाटील, दुय्यम निरीक्षक सागर नलवडे, रियाज शेख तसेच कळवण विभागाचे निरीक्षक सी. एच. पाटील व आर. जे. पाटील यांच्या नेतृत्वाखाली पथकाने छापा टाकला. कारवाईदरम्यान बनावट देशी व विदेशी मद्य, रिकाम्या आणि भरलेल्या बाटल्या, बनावट स्टिकर्स, मद्यनिर्मितीसाठी लागणारे साहित्य तसेच वाहतुकीसाठी वापरण्यात येणारी पिकअप (एमएच-१८-एम-३६८०) आणि दुचाकी (एमएच-९८-एआर-६४१८) जप्त करण्यात आल्या.
विशेष म्हणजे, संबंधित शेडमध्ये काय सुरू आहे, याची माहिती स्थानिक गावकऱ्यांनाही नव्हती. छाप्यादरम्यान मोठ्या प्रमाणावर बनावट मद्याचा साठा आणि बनवाट स्टिकर्स आढळून आले. या प्रकरणी मद्यसाठा तयार करणारे, साठवणूक करणारे, वाहतूक करणारे, पुरवठादार आणि वाहन मालक यांच्याविरोधात गुन्हा दाखल करण्यात आला असून पुढील तपास सुरू आहे.
