मुंबई प्रतिनिधी
लोकलच्या उघड्या दरवाजांवर लटकून होणाऱ्या जीवघेण्या प्रवासाला आळा घालण्यासाठी मध्य रेल्वे प्रशासनाने महत्त्वाचा निर्णय घेतला असून स्वयंचलित दरवाजांची पहिली ‘नॉन-एसी’ उपनगरी लोकल येत्या आठवड्यात मुंबईत दाखल होण्याची शक्यता आहे. वातानुकूलित लोकलप्रमाणेच बंद दरवाजांची व्यवस्था असलेली ही ट्रेन साध्या दरात उपलब्ध होणार असल्याने प्रवाशांसाठी मोठा दिलासा मानला जात आहे.
फेब्रुवारीअखेरपर्यंत चेन्नई येथील इंटिग्रल कोच फॅक्टरी (आयसीएफ) कारखान्यातून ही लोकल मुंबईत पोहोचेल, अशी माहिती रेल्वे अधिकाऱ्यांनी दिली. उपक्रमाच्या पहिल्या टप्प्यात एक लोकल ताफ्यात समाविष्ट होईल; मार्चमध्ये दुसरी लोकल दाखल होण्याचे नियोजन आहे. या रचनेची चाचणी सप्टेंबर २०२५ मध्ये कुर्ला कारशेडमध्ये यशस्वी झाली होती. ही लोकल प्रामुख्याने छत्रपती शिवाजी महाराज टर्मिनस ते कल्याण या मुख्य मार्गावर चालवण्याचा विचार आहे.
अपघातांवर नियंत्रणाचा प्रयत्न
उघड्या दरवाजांमुळे फूटबोर्डवर उभे राहून प्रवास करणाऱ्या प्रवाशांचे अपघाती मृत्यू रोखणे हा या प्रयोगामागील मुख्य उद्देश आहे. गेल्या वर्षी मुंब्रा स्थानकाजवळ एका दिवसात पाच प्रवाशांचा पडून मृत्यू झाल्यानंतर रेल्वे प्रशासनावर सुरक्षिततेच्या उपाययोजनांचा दबाव वाढला होता. नव्या लोकलमध्ये सर्व दरवाजे पूर्णपणे बंद झाल्याशिवाय गाडी हलणार नाही, अशी यंत्रणा बसविण्यात आली आहे.
घुसमट व तांत्रिक अडचणींची चिंता
या प्रयोगाचे स्वागत होत असतानाच प्रवासी व तज्ज्ञांकडून काही प्रश्न उपस्थित झाले आहेत. नॉन-एसी लोकलमध्ये दरवाजे बंद राहिल्यास उन्हाळ्यात व गर्दीच्या वेळी घुसमट होण्याची शक्यता व्यक्त होत आहे. तसेच दरवाजांत हात किंवा बॅग अडकल्यास गाडी उशिरा सुटण्याची भीतीही व्यक्त केली जात आहे, ज्याचा परिणाम संपूर्ण वेळापत्रकावर होऊ शकतो.
प्रवासी संघटनांची सूचना
मुंबई रेल्वे प्रवासी संघटनांनी या लोकलच्या फेऱ्या मर्यादित न ठेवता योग्य नियोजन करण्याची मागणी केली आहे. बंद दरवाजांमुळे प्रवासी बाहेर पडण्याचा धोका कमी होईल; मात्र डब्यांत हवा खेळती राहील यासाठी पुरेशी वायुवीजन व्यवस्था करणे आवश्यक असल्याचे संघटनांचे मत आहे. सुरक्षित प्रवासासाठी गर्दी कमी करणे हेच प्रशासनासमोरील मोठे आव्हान राहणार असल्याचेही त्यांनी नमूद केले.
