मुंबई प्रतिनिधी
बॉलिवूड अभिनेता सलमान खाननंतर आता अभिनेता आमिर खान याच्याही सुरक्षेबाबत चिंता व्यक्त केली जात आहे. लॉरेन्स बिश्नोई टोळीच्या नावाने सोशल मीडियावर व्हायरल झालेल्या एका पोस्ट आणि कथित ऑडिओ क्लिपमध्ये आमिर खानला जीवेमारण्याची धमकी देण्यात आल्याचा दावा करण्यात आला आहे. मात्र, या पोस्ट आणि ऑडिओ क्लिपची सत्यता अद्याप अधिकृतरीत्या सिद्ध झालेली नसून, मुंबई पोलिसांचे सायबर सेल संपूर्ण प्रकरणाची कसून चौकशी करत आहे.
सोशल मीडियावर व्हायरल झालेल्या पोस्टमध्ये स्वतःला लॉरेन्स बिश्नोई टोळीशी संबंधित असल्याचा दावा करणाऱ्या व्यक्तींनी आमिर खानला लक्ष्य करत गंभीर आरोप केले आहेत. या पोस्टमध्ये “अर्जू बिश्नोई” आणि “टायसन बिश्नोई” अशी नावे वापरण्यात आली असून, त्यांच्याकडून अभिनेत्याविरोधात आक्षेपार्ह आणि धमकीची भाषा वापरण्यात आल्याचे दिसून येते. याचबरोबर, एक कथित ऑडिओ क्लिपही मोठ्या प्रमाणात व्हायरल झाली आहे. त्या क्लिपमध्ये स्वतःला “टायसन बिश्नोई” म्हणून ओळख करून देणारी व्यक्ती आमिर खानविरोधात उघडपणे धमकी देताना ऐकू येत असल्याचा दावा केला जात आहे.
दरम्यान, या पोस्टमध्ये आमिर खानवर देशाच्या संस्कृतीविरोधी प्रचार केल्याचा आरोप करण्यात आला आहे. तसेच ‘लव्ह जिहाद’सारख्या संवेदनशील मुद्द्यांचा उल्लेख करून सनातन धर्माच्या विरोधात जाणाऱ्यांना कठोर परिणाम भोगावे लागतील, असा इशाराही देण्यात आला आहे. पोस्टमध्ये राजस्थानमधील श्रीगंगानगर येथील एका अल्पवयीन मुलीवरील अत्याचार प्रकरणाचाही संदर्भ देण्यात आला असून, आरोपींना संरक्षण देणाऱ्यांनाही लक्ष्य करण्यात आले आहे.
याचबरोबर, अलीकडेच पोलिस चकमकीत ठार झालेल्या परवेश आणि हिमांशू या कथित टोळी सदस्यांचा उल्लेख ‘शहीद’ असा करत त्यांच्या मृत्यूचा बदला घेतला जाईल, असा दावाही या संदेशात करण्यात आला आहे. या मजकुरामुळे सुरक्षा यंत्रणांनी संपूर्ण प्रकरण गांभीर्याने घेतले आहे.
मात्र, या सर्व दाव्यांबाबत अधिकृत स्तरावर कोणतीही पुष्टी झालेली नाही. मुंबई पोलिसांच्या सायबर शाखेने व्हायरल पोस्ट, संबंधित सोशल मीडिया अकाउंट्स, ऑडिओ क्लिप आणि त्यामागील तांत्रिक पुरावे तपासण्यास सुरुवात केली आहे. ही पोस्ट प्रत्यक्षात बिश्नोई टोळीशी संबंधित व्यक्तींनी केली आहे की केवळ समाजात भीतीचे वातावरण निर्माण करण्यासाठी कोणीतरी खोटी माहिती प्रसारित केली आहे, याचा शोध घेतला जात आहे.
तपास यंत्रणांच्या मते, सोशल मीडियावरील कोणतीही माहिती अधिकृत पडताळणीशिवाय खरी मानता येत नाही. त्यामुळे नागरिकांनी अफवांवर विश्वास ठेवू नये आणि अप्रमाणित पोस्ट पुढे पाठवू नयेत, असे आवाहनही करण्यात येत आहे.
दरम्यान, या कथित धमकीबाबत आमिर खान किंवा त्याच्या व्यवस्थापनाकडून अद्याप कोणतेही अधिकृत निवेदन प्रसिद्ध करण्यात आलेले नाही. वृत्तानुसार, आमिर खान सध्या पत्नी गौरीसोबत ऑस्ट्रेलिया दौऱ्यावर असून, मेलबर्न येथे आयोजित भारतीय चित्रपट महोत्सवात (IFFM) सहभागी झाला आहे. यावेळी त्याच्या गाजलेल्या ‘लगान’ चित्रपटाच्या प्रदर्शित होऊन २५ वर्षे पूर्ण झाल्याचा विशेष सोहळाही आयोजित करण्यात आला आहे.
सलमान खानला यापूर्वी अनेक वेळा बिश्नोई टोळीच्या नावाने धमक्या मिळाल्यानंतर त्याच्या सुरक्षेत मोठी वाढ करण्यात आली होती. आता आमिर खानच्या नावाने समोर आलेल्या या कथित धमकीमुळे बॉलिवूड कलाकारांच्या सुरक्षेचा मुद्दा पुन्हा एकदा ऐरणीवर आला आहे. मात्र, तपास पूर्ण होईपर्यंत या पोस्टमागील व्यक्ती आणि त्यांचे दावे याबाबत कोणताही ठोस निष्कर्ष काढणे योग्य ठरणार नसल्याचे सुरक्षा यंत्रणांनी स्पष्ट केले आहे.
