बीड प्रतिनिधी
बीड शहरात खळबळ उडवणारी घटना समोर आली असून, गेल्या २४ तासांपासून बेपत्ता असलेल्या वस्तू व सेवा कर (जीएसटी) विभागातील वरिष्ठ अधिकाऱ्याचा मृतदेह त्यांच्या चारचाकी वाहनात आढळून आला आहे. या प्रकरणात मृत अधिकाऱ्याने लिहिल्याचा दावा करण्यात येणारी सुसाईड नोट पोलिसांच्या हाती लागली असून, त्यात विभागातील एका वरिष्ठ अधिकाऱ्यावर मानसिक छळाचे गंभीर आरोप करण्यात आले आहेत. या घटनेमुळे प्रशासकीय वर्तुळात तणावाचे वातावरण निर्माण झाले आहे.
मृत अधिकाऱ्याचे नाव सचिन नारायण जाधवर (वय ४५, रा. बीड) असे असून, ते जीएसटी विभागात महत्त्वाच्या पदावर कार्यरत होते. शुक्रवारी रात्री कामावरून घरी न परतल्याने आणि फोन संपर्कात न आल्याने कुटुंबीयांनी सर्वत्र शोध घेतला. अखेर शिवाजीनगर पोलीस ठाण्यात जाधवर बेपत्ता असल्याची तक्रार नोंदविण्यात आली.
दरम्यान, शनिवारी (१७ जानेवारी) दुपारी सुमारे एक वाजण्याच्या सुमारास धुळे–सोलापूर राष्ट्रीय महामार्गालगत कपिलधार कमानीजवळील बायपास रोडवर, पाली परिसरात रस्त्याच्या कडेला एक कार संशयास्पदरीत्या उभी असल्याचे स्थानिकांच्या निदर्शनास आले. माहिती मिळताच बीड ग्रामीण पोलिसांनी घटनास्थळी धाव घेतली असता, वाहनाच्या आत जाधवर यांचा मृतदेह आढळून आला.
पोलिसांनी पंचनामा करून वाहनाची झडती घेतली असता, एक चिठ्ठी (सुसाईड नोट) सापडली. प्राथमिक माहितीनुसार, या चिठ्ठीत जाधवर यांनी आपल्या टोकाच्या निर्णयामागील कारण नमूद केले असून, जीएसटी विभागातील वरिष्ठ अधिकारी दिलीप फाटे यांच्या मानसिक छळामुळे आपण हा निर्णय घेत असल्याचा आरोप करण्यात आला आहे. वरिष्ठांकडून होत असलेला ताण सहन न झाल्याने हा प्रकार घडल्याचा उल्लेख चिठ्ठीत असल्याचे पोलिसांकडून सांगण्यात आले.
या प्रकरणाचे गांभीर्य लक्षात घेऊन पोलिसांनी तातडीची पावले उचलली आहेत. बीड ग्रामीण पोलीस ठाण्याचे निरीक्षक अशोक मुदिराज यांनी दिलेल्या माहितीनुसार, सुसाईड नोटमध्ये नाव असलेल्या अधिकारी दिलीप फाटे यांना चौकशीसाठी ताब्यात घेण्यात आले आहे. जाधवर यांचा मृतदेह जिल्हा सामान्य रुग्णालयात शवविच्छेदनासाठी पाठविण्यात आला असून, अहवालानंतर पुढील कारवाईचा निर्णय घेतला जाणार आहे.
दरम्यान, जाधवर आणि संशयित अधिकाऱ्यांमधील अलीकडील संवाद, कार्यालयीन व्यवहार, तसेच विभागातील अंतर्गत वाद यांची सखोल चौकशी सुरू असल्याचे पोलिसांनी स्पष्ट केले. सुसाईड नोटच्या सत्यतेची पडताळणी, हस्ताक्षर तज्ज्ञांचा अहवाल, कॉल रेकॉर्ड्स आणि अन्य तांत्रिक पुरावे तपासले जात आहेत.
एका जबाबदार शासकीय अधिकाऱ्याचा संशयास्पद मृत्यू आणि त्यामागे वरिष्ठांवरील आरोप समोर आल्याने बीड जिल्ह्यात मोठी खळबळ उडाली आहे. या घटनेचे पडसाद प्रशासकीय वर्तुळात उमटत असून, प्रकरणाचा पुढील तपास बीड ग्रामीण पोलीस करत आहेत.
