सातारा प्रतिनिधी
सातारा|महाराज असल्याचा ढोंगी प्रचार करणारा परमेश्वरानंद उर्फ गोट्या महाराज साताऱ्यात चक्क गांजाची शेती करत असल्याचे उघड झाले. सातारा पोलिसांच्या वेधामुळे या रॅकेटचा पर्दाफाश झाला असून, तीन गोण्या गांजा जप्त करण्यात आला आहे. यातील एक आरोपी अटक झाला असला तरी महाराज अद्याप पसार आहे.
अटक करण्यात आलेला आरोपी म्हणजे लहू बंडूबा मोरे (वय २५, राहणार सिंदोर). पोलिसांनी सांगितले की, सातारा गावात दुचाकीवर एक तरुण गांजा विक्रीसाठी येत असल्याची माहिती मिळाली होती. पोलीस निरीक्षक कृष्णा शिंदे यांच्या मार्गदर्शनाखाली उपनिरीक्षक गोविंद एकिलवाले, निर्मला राग, दीपक बचाटे, नंदकुमार भंडारे, अमलदार सुनील बेलकर, दीपक शिंदे, जगदीश खंडाळकर यांच्या पथकाने होळकर चौक ते सातारा गाव रस्त्यावर सापळा रचला.
संशयित आरोपी घटनास्थळी आला असता त्याच्याकडून ३८५ ग्रॅम गांजा जप्त करण्यात आला . पोलिसांच्या चौकशीत त्याने गेवराई बुद्रुक येथील डोंगरावर गांजाची शेती असल्याचे कबूल केले. या डोंगर परिसरातील जनावरांच्या गोठ्यात तीन गोण्यामध्ये ३० किलो गांजा सापडला. परंतु परमेश्वरानंद महाराज पोलीस येण्यापूर्वीच पळून गेला.
परमेश्वरानंद महाराज हा जनावरांना पाळून सेंद्रिय खत बनवतो आणि त्याची विक्री करतो, परंतु त्याच डोंगर परिसरात गांजाचे पीक घेऊन विक्रीही करत होता, असे पोलिसांनी सांगितले. या प्रकरणाने जिल्ह्यातील सुरक्षा दलांमध्ये खळबळ उडाली असून, पोलीस तपास सुरू ठेवले आहेत.
