जळगाव प्रतिनिधी
जळगाव जिल्ह्यातील धरणगाव तालुक्यात एक हृदयद्रावक आणि संतापजनक घटना घडली आहे. दारू पिण्याच्या वादातून मुलानेच ७५ वर्षीय जन्मदात्या वडिलांचा निर्घृण खून केला आहे. या घटनेने परिसरात एकच खळबळ उडाली असून आरोपी मुलगा सध्या पोलिसांच्या ताब्यात आहे.
मृत वडिलांचे नाव छगन यादव कोळी तर संशयित आरोपी मुलाचे नाव समाधान कोळी असे आहे. धरणगाव तालुक्यातील चांदसर येथे शनिवारी रात्री ही घटना घडली. दारू पिऊन घरी परतलेल्या समाधान कोळी याचा वडिलांशी वाद झाला. वाद चिघळत गेल्याने संतप्त अवस्थेत समाधान याने विळ्याने वडिलांच्या पोटावर वार केला.
गंभीर जखमी अवस्थेत छगन कोळी यांना तातडीने जळगाव शासकीय वैद्यकीय महाविद्यालयात दाखल करण्यात आले. मात्र उपचारादरम्यान त्यांचा मृत्यू झाला. घटनेनंतर पोलिसांनी तत्काळ कारवाई करत समाधान कोळी याला अटक केली असून, धरणगाव पोलिस ठाण्यात खुनाचा गुन्हा दाखल करण्यात आला आहे.
या निर्घृण हत्येमुळे चांदसर गावात भीती आणि संतापाचे वातावरण पसरले असून, एकाच कुटुंबात रक्ताने नातं तुटल्याची चर्चा सर्वत्र रंगली आहे.
