मुंबई प्रतिनिधी
मुंबईकरांच्या सुरक्षिततेचा प्रश्न पुन्हा एकदा ऐरणीवर आला आहे. बेस्ट बसच्या अपघातांची मालिका थांबण्याचे नाव घेत नसतानाच वडाळा परिसरात सोमवारी (९ नोव्हेंबर) रात्री आणखी एक भीषण अपघात घडला. लोढा जंक्शन येथील सिग्नलवर उभ्या असलेल्या दोन मोटारींना भरधाव बेस्ट बसने जोरदार धडक दिली. या धडकेची तीव्रता इतकी भीषण होती की, दोन्ही मोटारींचा अक्षरशः चक्काचूर झाला. या अपघातात पाच जण जखमी झाले असून त्यापैकी दोघांची प्रकृती चिंताजनक असल्याची माहिती समोर आली आहे. एका पाळीव कुत्र्यालाही दुखापत झाली आहे. अपघातानंतर पोलिसांनी बसचालकाला ताब्यात घेतले असून बसही तपासासाठी ताब्यात घेण्यात आली आहे.
नेमका अपघात कसा घडला?
मुंबईतील वडाळा येथील लोढा जंक्शन परिसरात सोमवारी रात्री साडेआठच्या सुमारास हा अपघात घडला. त्यावेळी वाहतूक सिग्नल लाल असल्याने वाहनांची रांग लागली होती. एक बेस्ट बस सिग्नलवर थांबली होती. तिच्या मागे मारुती अर्टिगा आणि हुंदाई क्रेटा या दोन मोटारी उभ्या होत्या. त्याचवेळी मागून वेगाने येणाऱ्या बेस्टच्या चॅलो बसवरील चालकाचे नियंत्रण सुटले आणि बसने समोरील वाहनांना जोरदार धडक दिली.
या धडकेमुळे दोन्ही मोटारी पुढील बेस्ट बसमध्ये अडकल्या. दोन अवजड बसच्या मध्ये मोटारी सापडल्याने त्यांचे मोठ्या प्रमाणात नुकसान झाले. अर्टिगा मोटारीच्या चालकाच्या पायाला गंभीर दुखापत झाली, तर अन्य प्रवाशांनाही मार लागला. क्रेटा मोटारीतील प्रवासीही जखमी झाले. अपघाताचा आवाज ऐकताच परिसरातील नागरिकांनी घटनास्थळी धाव घेतली.
दोन जणांची प्रकृती चिंताजनक
या अपघातात शिवानी पाल (६३), हसन शेख (३३), गणेश इंद्रपाल (७५), बालाजी पांडुरंग (३७) आणि मधू पाल (२८) हे पाच जण जखमी झाले आहेत. त्यापैकी शिवानी पाल आणि हसन शेख यांना डोक्याला गंभीर दुखापत झाली असून त्यांची प्रकृती चिंताजनक असल्याचे वृत्त आहे. गणेश इंद्रपाल यांच्या डोक्याला आणि छातीला दुखापत झाली आहे. बालाजी पांडुरंग यांच्या डाव्या हाताला, तर मधू पाल यांच्या डोक्याला आणि डाव्या हाताला दुखापत झाली आहे.
सर्व जखमींना तातडीने सायन येथील लोकमान्य टिळक रुग्णालयात उपचारासाठी दाखल करण्यात आले. अपघातात एका पाळीव कुत्र्यालाही दुखापत झाल्याची माहिती समोर आली आहे.
बसचालक पोलिसांच्या ताब्यात; निष्काळजीपणाचा तपास
अपघाताची माहिती मिळताच वडाळा ट्रक टर्मिनल पोलीस आणि वाहतूक पोलिसांनी घटनास्थळी धाव घेतली. अपघातामुळे लोढा जंक्शन परिसरातील वाहतूक काही काळ विस्कळीत झाली होती. पोलिसांनी क्रेनच्या मदतीने अपघातग्रस्त वाहने रस्त्याच्या बाजूला हटवली. त्यानंतर सुमारे तासाभराने वाहतूक पूर्ववत करण्यात आली.
या प्रकरणी बेस्ट बसचालकाविरोधात निष्काळजीपणे आणि बेदरकारपणे वाहन चालवल्याप्रकरणी गुन्हा दाखल करण्याची प्रक्रिया सुरू करण्यात आली आहे. पोलिसांनी चालकाला ताब्यात घेतले असून संबंधित बसही तपासासाठी ताब्यात घेण्यात आली आहे. पोलीस उपायुक्त महेंद्र पंडित यांनी या घटनेची पुष्टी केली असून पुढील कायदेशीर कारवाई सुरू असल्याचे सांगितले आहे.
ब्रेक फेल की चालकाचा निष्काळजीपणा?
बेस्ट बसचे नियंत्रण नेमके कशामुळे सुटले, याचा तपास आता पोलिसांकडून केला जात आहे. बसचे ब्रेक निकामी झाले होते का, बसमध्ये तांत्रिक बिघाड झाला होता का, की चालकाच्या निष्काळजीपणामुळे हा अपघात घडला, याची पडताळणी केली जाणार आहे. यासाठी बसची तांत्रिक तपासणी आणि तज्ज्ञांकडून परीक्षण करण्यात येणार आहे. तपासाच्या निष्कर्षानंतर अपघाताचे नेमके कारण स्पष्ट होणार आहे.
कुर्ला आणि भांडुपच्या दुर्घटनांनंतर पुन्हा बेस्ट चर्चेत
मुंबईत बेस्ट बसच्या अपघातांचा प्रश्न यापूर्वीही गंभीरपणे समोर आला आहे. कुर्ला येथे डिसेंबर २०२४ मध्ये झालेल्या भीषण बेस्ट बस अपघातात नऊ जणांचा मृत्यू झाला होता, तर अनेक जण जखमी झाले होते. त्यानंतर भांडुप परिसरातही बेस्ट बसच्या अपघातात चार जणांचा मृत्यू झाल्याची घटना घडली होती. या पार्श्वभूमीवर वडाळ्यातील ताज्या अपघाताने सार्वजनिक वाहतूक व्यवस्थेतील वाहनांची तांत्रिक तपासणी, चालकांचे प्रशिक्षण आणि रस्त्यावरील सुरक्षिततेचा प्रश्न पुन्हा ऐरणीवर आणला आहे.
मुंबईसारख्या प्रचंड वाहतूक असलेल्या शहरात हजारो प्रवासी दररोज बेस्ट बसने प्रवास करतात. त्यामुळे बसची नियमित देखभाल, ब्रेक आणि अन्य यंत्रणांची तपासणी तसेच चालकांच्या कामकाजावर प्रभावी नियंत्रण ठेवणे अत्यावश्यक आहे. अन्यथा अशा दुर्घटनांमध्ये निष्पाप नागरिकांचा जीव धोक्यात येण्याची भीती कायम राहणार आहे.


