सातारा प्रतिनिधी
येथील रा. ना. गोडबोले (सार्वजनिक) ट्रस्ट व जिल्ह्यातील नागरिकांतर्फे दिला जाणारा सातारा भूषण पुरस्कार २०२४ चा ३४ वा पुरस्कार कृष्णा विश्‍‍व विद्यापीठाचे कुलगुरू डॉ. सुरेश भोसले यांना जाहीर झाला आहे.
कला, क्रीडा, सामाजिक, आध्यात्मिक, औद्योगिक, व्यावसायिक क्षेत्रात काम करणाऱ्या व आपल्या उत्तुंग यशाने साताऱ्याचे नाव उज्ज्वल करणाऱ्या व्यक्ती, संस्थांना १९९१ पासून हा पुरस्कार दिला जातो. डॉ. भोसले यांना लवकरच एका कार्यक्रमात पुरस्कार प्रदान करणार असल्याची माहिती ट्रस्टी अशोक गोडबोले, उदयन गोडबोले व डॉ. अच्युत गोडबोले यांनी दिली.
यापूर्वी तर्कतीर्थ लक्ष्मणशास्त्री जोशी, छोटा गंधर्व, अभिनेते सयाजी शिंदे, राजमाता सुमित्राराजे भोसले, ह.भ.प. बाबा महाराज सातारकर, यमुनाबाई वाईकर, फरोख कूपर, डॉ. नरेंद्र दाभोलकर, प्रताप गंगावणे, डॉ. प्रमोद चौधरी, डॉ. रणजित जगताप आदींना पुरस्काराने सन्मानित करण्यात आले आहे.
डॉ. सुरेश भोसले हे कऱ्हाड येथील कृष्णा विश्‍‍व विद्यापीठाचे कुलगुरू आहेत. डॉ. भोसले हे नामांकित सर्जन असून, मिरज मेडिकल कॉलेजमध्ये शिक्षण पूर्ण झाल्यावर १९८५ पासून कृष्णा इन्स्टिट्यूट ऑफ मेडिकल सायन्स येथे त्यांनी कार्य सुरू केले. प्रोफेसर, विभाग प्रमुखपासून ते कुलपतीपदापर्यंत अनेक जबाबदाऱ्या ते सांभाळत आले आहेत. कृष्णा चॅरिटेबल ट्रस्ट व शेतकरी शिक्षण प्रसारक मंडळाचे अध्‍यक्ष म्हणून ते काम पाहतात.
२०१९ पासून कुलपती, कृष्णा विश्‍‍व विद्यापीठ ही जबाबदारी ते कौशल्याने पार पाडत आहेत. कृष्णा हॉस्पिटलचा विस्तार, आधुनिकीकरण व त्यामार्फत समाजसेवा, सभासद शेतकऱ्यांचे हित ते बघत आहेत. आता शिरवळ येथे नवीन कॉलेज व विद्यापीठ स्थापन करण्यात येणार आहे.
सहकार क्षेत्रातही त्यांचे मोठे योगदान आहे. कृष्णा कारखान्याचे १९९९ पासून ते अध्‍यक्ष आहेत. ४५ हजार सभासद व दोन हजार कामगारांचे हित जोपासत त्यांचे जीवनमान उंचावण्याचा ते प्रयत्न करत आहेत. कृष्णा कारखाना प्रगतिपथावर नेण्यात त्यांचा सिंहाचा वाटा आहे. कारखान्याला अनेक पुरस्कार प्राप्त झाले आहेत.
२००७ मध्‍ये त्यांनी जयवंत शुगर्स हा नवीन कारखाना सुरू केला.
२००३ मध्‍ये कृष्णा शेतकी कॉलेज सुरू केले. कृष्णा सहकारी बँकेचे अध्‍यक्ष म्हणून त्यांचे मोठे योगदान आहे. कोरोना काळातही अतुलनीय कार्य करणाऱ्या डॉ. भोसले यांची निवड रा. ना. गोडबोले ट्रस्टतर्फे अरुण गोडबोले, प्रा. पुरुषोतम शेठ, सार्वजनिक बांधकाममंत्री शिवेंद्रसिंहराजे भोसले यांच्या निवड समितीद्वारे करण्यात आल्याचे गोडबोले यांनी नमूद केले.
