सातारा प्रतिनिधी
विद्यार्थ्याला होत असलेली अमानुष मारहाण रोखण्यासाठी मध्यस्थी करणाऱ्या एका महिला शिक्षिकेलाच शाळेच्या मुख्याध्यापकाने काठीने बेदम मारहाण केल्याची अत्यंत धक्कादायक आणि संतापजनक घटना वाई तालुक्याच्या पश्चिम भागातील खावली येथील जिल्हा परिषद प्राथमिक शाळेत गुरुवारी सकाळी घडली. या अनपेक्षित आणि हिंसक हल्ल्यात संबंधित महिला शिक्षिका गंभीर जखमी झाल्या असून, त्यांच्यावर वाई येथील ग्रामीण रुग्णालयात उपचार सुरू आहेत. या घटनेमुळे सातारा जिल्ह्यातील शैक्षणिक वर्तुळात प्रचंड खळबळ उडाली असून, ग्रामस्थ आणि पालकांमधून तीव्र संताप व्यक्त होत आहे. याप्रकरणी वाई पोलीस ठाण्यात आरोपी मुख्याध्यापकाविरुद्ध विविध कलमांखाली गुन्हा दाखल करण्यात आला असल्याची माहिती पोलीस निरीक्षक प्रदीप सूर्यवंशी यांनी दिली आहे.
पोलिसांकडून मिळालेल्या प्राथमिक माहितीनुसार, खावली येथील जिल्हा परिषद प्राथमिक शाळेचे कामकाज नेहमीप्रमाणे सुरू असताना गुरुवारी सकाळी मुख्याध्यापक एका लहान विद्यार्थ्याला काठीने अमानुषपणे मारहाण करत होते. त्या चिमुरड्याचा हृदयद्रावक आक्रोश ऐकून शाळेतील सहकारी महिला शिक्षिका धावतच त्या वर्गाच्या दिशेने गेल्या. लहान मुलाला होत असलेली अमानुष मारहाण पाहून त्यांनी तातडीने मध्यस्थी केली व मुख्याध्यापकांना रोखण्याचा प्रयत्न केला. मात्र, यामुळे संतापलेल्या मुख्याध्यापकाचा स्वतःवरील ताबा सुटला आणि त्यांनी थेट मध्यस्थी करणाऱ्या महिला शिक्षिकेवरच हातात असलेल्या काठीने सपासप वार करत हल्ला चढवला. या भ्याड हल्ल्यात शिक्षिका गंभीर जखमी झाल्या आणि कोसळल्या. घटनेनंतर शाळेतील इतर कर्मचारी व स्थानिकांनी जखमी शिक्षिकेला तातडीने वाई येथील ग्रामीण रुग्णालयात उपचारासाठी दाखल केले.
ज्ञान मंदिरातच चिमुरड्या विद्यार्थ्यांसमोर घडलेल्या या हिंसक आणि संतापजनक प्रकारामुळे खावली गावातील ग्रामस्थ आणि पालकांमध्ये तीव्र संतापाचे वातावरण निर्माण झाले आहे. याप्रकरणी जखमी शिक्षिकेने दिलेल्या फिर्यादीवरून वाई पोलिसांनी आरोपी मुख्याध्यापकाविरुद्ध गुन्हा दाखल केला असून, पोलीस हवालदार किरण इथापे या प्रकरणाचा पुढील तपास करत आहेत. दरम्यान, पवित्र अशा ज्ञान मंदिरात चिमुकल्यांना व महिला शिक्षिकेला अशा प्रकारे बेदम मारहाण करणाऱ्या या विकृत मानसिकतेच्या मुख्याध्यापकावर केवळ गुन्हा दाखल करून न थांबता, त्याचे शिक्षण विभागाकडून तात्काळ निलंबन करण्यात यावे आणि त्याच्यावर कठोर कायदेशीर कारवाई करण्यात यावी, अशी आक्रमक मागणी वाई तालुक्यातील विविध शैक्षणिक व सामाजिक संघटनांसह पालकांमधून केली जात आहे.
