सातारा प्रतिनिधी
सातारा जिल्ह्यातील फलटण तालुक्यातील खामगाव येथे बुधवारी पहाटे घडलेल्या हृदयद्रावक दुर्घटनेत विजेच्या धक्क्यामुळे एकाच कुटुंबातील चौघांचा जागीच मृत्यू झाला. कुटुंबप्रमुखाला वाचविण्यासाठी एकामागोमाग धाव घेतलेल्या इतर तिघांनाही विद्युत प्रवाहाचा फटका बसल्याने काही क्षणांतच संपूर्ण शिंदे कुटुंब उद्ध्वस्त झाले. या घटनेमुळे खामगावसह संपूर्ण परिसरात शोककळा पसरली असून, दुर्घटनेमागील नेमके कारण शोधण्यासाठी पोलिसांनी तपास सुरू केला आहे.
पोलिसांनी दिलेल्या प्राथमिक माहितीनुसार, खामगाव येथील एका खासगी इंग्रजी माध्यमाच्या शाळेजवळ ही घटना पहाटे साडेपाच ते सहा वाजण्याच्या दरम्यान घडली. किसन पिसुरड्या शिंदे हे नेहमीप्रमाणे घराबाहेर पडले असता, तेथून गेलेल्या विद्युत वाहिनीमध्ये अचानक उतरलेल्या विद्युत प्रवाहाच्या संपर्कात आल्याने त्यांना तीव्र विजेचा धक्का बसला. ते जागीच अडकून पडल्याचे पाहून त्यांच्या मदतीसाठी घरातील गंगुबाई शिंदे, सचिन शिंदे आणि आरती शिंदे हे तिघेही धावले.
मात्र, विद्युत प्रवाहाची तीव्रता इतकी मोठी होती की, मदतीसाठी गेलेले तिघेही त्याच प्रवाहाच्या विळख्यात सापडले. काही क्षणांतच चौघांचाही जागीच मृत्यू झाला. मदतीसाठी धाव घेणारेच मृत्यूच्या विळख्यात अडकल्याने हा प्रसंग अत्यंत वेदनादायी ठरला.
घटनेची माहिती मिळताच परिसरातील नागरिकांनी घटनास्थळी धाव घेतली. तत्काळ वीजपुरवठा खंडित करण्यात आला. त्यानंतर फलटण ग्रामीण पोलिसांनी घटनास्थळी पोहोचून परिसर ताब्यात घेतला. पंचनामा करून चारही मृतदेह शवविच्छेदनासाठी फलटण उपजिल्हा रुग्णालयात पाठविण्यात आले.
दरम्यान, घराबाहेरील विद्युत वाहिनीत अचानक प्रवाह कसा उतरला, ही दुर्घटना तांत्रिक बिघाडामुळे घडली की अन्य कोणत्या कारणामुळे, तसेच संबंधित यंत्रणेकडून कोणताही निष्काळजीपणा झाला होता का, याचा तपास सुरू करण्यात आला आहे. आवश्यक तांत्रिक अहवाल आल्यानंतर दुर्घटनेमागील नेमके कारण स्पष्ट होणार असल्याचे पोलिसांनी सांगितले.
या घटनेमुळे शिंदे कुटुंबाच्या नातेवाईकांवर दुःखाचा डोंगर कोसळला आहे. एका क्षणात संपूर्ण कुटुंब उद्ध्वस्त झाल्याने गावात शोकमय वातावरण निर्माण झाले असून, नागरिकांनी या दुर्घटनेबद्दल तीव्र हळहळ व्यक्त केली आहे. तसेच अशा घटना टाळण्यासाठी विद्युत यंत्रणेची नियमित तपासणी, देखभाल आणि सुरक्षिततेच्या उपाययोजना अधिक प्रभावीपणे राबविण्याची मागणीही स्थानिकांकडून होत आहे.
दरम्यान, या दुर्घटनेबाबत महावितरण आणि संबंधित यंत्रणेकडून अधिकृत अहवालाची प्रतीक्षा असून, तपासानंतरच जबाबदारी निश्चित होणार आहे.
