मुंबई प्रतिनिधी
वसई-विरार परिसरात गेल्या चार दिवसांपासून सुरू असलेल्या मुसळधार पावसाचा फटका मंगळवारी संध्याकाळी पश्चिम रेल्वेच्या उपनगरी वाहतुकीला बसला. विरार रेल्वे स्थानक परिसर तसेच रेल्वे रुळांवर पाणी साचल्याने सुरक्षेच्या कारणास्तव पश्चिम रेल्वेने वसई रोड ते विरारदरम्यानची लोकल सेवा तात्पुरती स्थगित केली. परिणामी, चर्चगेट ते वसई रोड या मार्गावरच लोकल सेवा सुरू ठेवण्यात आली असून बहुतांश गाड्या सुमारे दहा मिनिटे उशिराने धावत आहेत.
गेल्या काही दिवसांपासून झालेल्या अतिवृष्टीमुळे विरार, नालासोपारा आणि वसई परिसरातील अनेक सखल भागांमध्ये पाणी साचले होते. दिवसभर पावसाने काहीशी विश्रांती घेतल्यानंतर मंगळवारी सायंकाळी पुन्हा मुसळधार सरी कोसळल्या. त्यामुळे विरार स्थानक परिसरातील रेल्वे रुळांवर पाणी वाढले आणि रेल्वे प्रशासनाला खबरदारीचा उपाय म्हणून वसईच्या पुढील वाहतूक थांबविण्याचा निर्णय घ्यावा लागला.
या निर्णयाचा सर्वाधिक फटका कार्यालयीन वेळेत मुंबईत आलेल्या हजारो नोकरदारांना बसला. सकाळी पाऊस कमी झाल्याने विरार, नालासोपारा आणि वसई परिसरातून मोठ्या संख्येने प्रवासी नेहमीप्रमाणे चर्चगेट, दादर, अंधेरी, बांद्रा तसेच दक्षिण मुंबईतील कार्यालयांमध्ये पोहोचले होते. मात्र, संध्याकाळी परतीच्या वेळेतच विरारकडे जाणारी लोकल सेवा बंद झाल्याने प्रवाशांची मोठी गैरसोय झाली.
वसई रोड स्थानकावर प्रवाशांची गर्दी वाढण्याची शक्यता व्यक्त करण्यात येत असून, नालासोपारा आणि विरारकडे जाणाऱ्या प्रवाशांना पर्यायी वाहतुकीचा आधार घ्यावा लागत आहे. मात्र, मुसळधार पावसामुळे महामार्ग आणि अंतर्गत रस्त्यांवरही वाहतूक संथ झाल्याने बस, खासगी वाहने किंवा रिक्षाद्वारे प्रवास करणेही वेळखाऊ ठरत आहे.
पश्चिम रेल्वे प्रशासनाने परिस्थितीवर सातत्याने लक्ष ठेवले असून, रुळांवरील पाण्याची पातळी कमी झाल्यानंतर आणि आवश्यक सुरक्षा तपासणी पूर्ण झाल्यानंतरच विरारकडे लोकल सेवा पूर्ववत करण्यात येईल, असे संकेत देण्यात आले आहेत. तोपर्यंत चर्चगेट ते वसई रोड या मार्गावरच मर्यादित सेवा सुरू राहणार आहे.
दरम्यान, हवामान खात्याने मुंबई महानगर प्रदेशात पुढील काही तास मुसळधार पावसाचा अंदाज वर्तविल्याने परिस्थितीवर प्रशासनाकडून बारकाईने लक्ष ठेवण्यात येत आहे. पावसाचा जोर कायम राहिल्यास रेल्वे सेवांवर आणखी परिणाम होण्याची शक्यता नाकारता येत नाही.
प्रवाशांनी घराबाहेर पडण्यापूर्वी पश्चिम रेल्वेकडून प्रसिद्ध होणारी अधिकृत माहिती तपासावी, तसेच अनावश्यक प्रवास टाळावा, असे आवाहन रेल्वे प्रशासनाने केले आहे.
