संभाजीनगर प्रतिनिधी
वटसावित्री पौर्णिमेला विवाहित महिला वडाच्या झाडाची पूजा करून पतीला दीर्घायुष्य लाभावे आणि सात जन्म हाच पती मिळावा, अशी प्रार्थना करतात. या पारंपरिक प्रथेला प्रतीकात्मक विरोध दर्शवत संभाजीनगरातील पत्नीपीडित पुरुषांनी वटपौर्णिमेच्या पूर्वसंध्येला पिंपळाच्या झाडाला उलट्या १०८ प्रदक्षिणा घालत, “अशी बायको नको रे बाबा” अशी प्रार्थना केली. यावेळी यमराजाला साकडे घालत पुढील जन्मी अशा प्रकारच्या वैवाहिक यातना वाट्याला येऊ नयेत, अशी मागणीही त्यांनी केली.
‘पत्नी पीडित पुरुष आश्रम’ या संस्थेच्या वतीने मागील सात वर्षांपासून हा प्रतीकात्मक उपक्रम राबविण्यात येत असून, यंदाही शनिवारी (२८ जून) सकाळी शहरातील आश्रम परिसरात हा कार्यक्रम पार पडला. सकाळी ९ ते १२ या वेळेत एकत्र आलेल्या पत्नीपीडित पुरुषांनी प्रथम पिंपळ वृक्षाचे पूजन केले. त्यानंतर उलट्या १०८ प्रदक्षिणा घालत आपल्या भावना व्यक्त केल्या. उपक्रमादरम्यान कावळ्याचे पूजनही करण्यात आले.
संस्थेच्या पदाधिकाऱ्यांच्या म्हणण्यानुसार, अनेक पुरुषांना वैवाहिक आयुष्यात मानसिक छळ, खोटे गुन्हे दाखल होणे, न्यायालयीन लढाया, आर्थिक शोषण, सामाजिक बदनामी तसेच कौटुंबिक विघटन अशा विविध समस्यांना सामोरे जावे लागले आहे. काहींना कुटुंबापासून दूर राहण्याची वेळ आली, तर काहींनी नैराश्यातून टोकाची पावले उचलल्याच्या घटनाही घडल्याचा दावा संस्थेने केला.
यावेळी संस्थेचे अध्यक्ष अॅड. भारत फुलारे म्हणाले, “ज्या प्रकारच्या वैवाहिक वेदना आणि संघर्ष आम्ही या जन्मात अनुभवले, ते पुन्हा कधीही आमच्या आयुष्यात येऊ नयेत, अशी ही प्रतीकात्मक प्रार्थना आहे. वटसावित्री पौर्णिमेच्या दिवशी यमराज व्यस्त असतील, म्हणून आम्ही एक दिवस आधीच त्यांना साकडे घालतो. उद्या आमच्या पत्नी सात जन्म हाच पती मिळावा म्हणून प्रार्थना करतील; मात्र आमच्या वेदनांचाही विचार व्हावा, अशी आमची अपेक्षा आहे.”
या अनोख्या उपक्रमाची शहरात चर्चा रंगली असून, काहींनी याकडे वैवाहिक समस्यांकडे लक्ष वेधण्याचा प्रयत्न म्हणून पाहिले, तर काहींनी या प्रकारावर टीकाही केली. दरम्यान, वैवाहिक वादांमध्ये दोन्ही बाजूंची भूमिका आणि कायदेशीर प्रक्रिया महत्त्वाची असल्याचे कायदेतज्ज्ञांचे मत असून, अशा संवेदनशील विषयांकडे संतुलित दृष्टीने पाहण्याची गरज व्यक्त केली जात आहे.
