अमरावती प्रतिनिधी
विदर्भातील प्रचंड उष्णतेने नागरिक हैराण झाले असताना भर उन्हात रस्त्यावर उभे राहून वाहतूक नियंत्रणाची जबाबदारी सांभाळणाऱ्या पोलिसांसाठी अमरावती पोलीस आयुक्तालयाने अत्याधुनिक ‘कुलिंग जॅकेट’ची सुविधा उपलब्ध करून दिली आहे. वाढत्या तापमानामुळे पोलिसांच्या आरोग्यावर होणारा परिणाम लक्षात घेऊन हा महत्त्वपूर्ण निर्णय घेण्यात आला असून, राज्यातील पोलिस दलासाठी हा उपक्रम आदर्श मानला जात आहे.
अमरावतीसह संपूर्ण विदर्भात तापमानाने ४५ अंश सेल्सिअसचा टप्पा ओलांडला आहे. दुपारच्या वेळी रस्त्यावर अक्षरशः आग ओकत असल्याची परिस्थिती निर्माण झाली आहे. अशा परिस्थितीत शहरातील प्रमुख चौकांमध्ये तासन्तास उभे राहून वाहतूक सुरळीत ठेवणाऱ्या पोलिसांना डिहायड्रेशन, चक्कर येणे, थकवा आणि उष्माघाताचा गंभीर धोका निर्माण होत होता. याच पार्श्वभूमीवर पोलिस कर्मचाऱ्यांच्या आरोग्याची काळजी घेत पोलीस आयुक्तालयाने १५० अत्याधुनिक ‘हायटेक कुलिंग जॅकेट’ची खरेदी केली आहे.
तीन विभागांमध्ये जॅकेटचे वितरण
वाहतूक शाखेच्या विविध विभागांमध्ये प्रत्येकी ५० या प्रमाणात जॅकेटचे वितरण करण्यात आले आहे. सध्या शहरातील राजापेठ, इर्विन चौक, पंचवटी चौक, गांधी चौक यांसारख्या प्रमुख ठिकाणी वाहतूक नियंत्रण करणारे पोलीस हे पांढऱ्या रंगाचे विशेष जॅकेट परिधान करून कर्तव्य बजावताना दिसत आहेत. या जॅकेटमुळे पोलिसांना उन्हाच्या तीव्र झळांपासून मोठा दिलासा मिळत असल्याचे सांगितले जात आहे.
शरीराचे तापमान ५ ते १० अंशांनी कमी ठेवण्याची क्षमता
या कुलिंग जॅकेटमध्ये आधुनिक वातानुकूलन तंत्रज्ञानाचा वापर करण्यात आला आहे. जॅकेटमध्ये बसविण्यात आलेले मिनी कुलिंग यंत्र सतत थंड हवेचा प्रवाह निर्माण करते. त्यामुळे शरीराभोवती थंडावा टिकून राहतो आणि बाहेरील तापमानाच्या तुलनेत शरीराचे तापमान ५ ते १० अंश सेल्सिअसपर्यंत कमी राहण्यास मदत होते.
ही जॅकेट मोबाईलप्रमाणे चार्ज करावी लागतात. एकदा पूर्ण चार्ज केल्यानंतर संपूर्ण शिफ्टमध्ये त्याचा प्रभाव कायम राहतो. विशेष म्हणजे रात्रीच्या ड्युटीदरम्यान वाहनचालकांना पोलिस सहज दिसावेत यासाठी जॅकेटवर रिफ्लेक्टर पट्ट्याही बसविण्यात आल्या आहेत.
‘उन्हाचा त्रास कमी झाला’
या जॅकेटचा वापर करणाऱ्या पोलिस कर्मचाऱ्यांनीही समाधान व्यक्त केले आहे. “पूर्वी दुपारच्या उन्हात उभे राहिल्यानंतर डोकेदुखी, अंगात अशक्तपणा आणि प्रचंड थकवा जाणवत असे. आता कुलिंग जॅकेटमुळे शरीराला सतत थंडावा मिळत असल्याने अधिक उत्साहाने काम करता येत आहे,” अशी प्रतिक्रिया काही कर्मचाऱ्यांनी दिली.
फक्त पोलिसांसाठीच नाही तर इतरांसाठीही उपयुक्त
तज्ज्ञांच्या मते, अशी कुलिंग जॅकेट केवळ वाहतूक पोलिसांसाठीच नव्हे तर बांधकाम कामगार, डिलिव्हरी रायडर्स, बाईकस्वार, औद्योगिक क्षेत्रातील कर्मचारी तसेच ट्रेकिंग, हायकिंग आणि कॅम्पिंग करणाऱ्यांसाठीही उपयुक्त ठरू शकतात. हलक्या आणि श्वसनक्षम कापडापासून तयार करण्यात आलेली ही जॅकेट दीर्घकाळ वापरासाठी सोयीची असल्याचे सांगितले जाते.
हवामान विभागाचा ‘यलो अलर्ट’
दरम्यान, प्रादेशिक हवामान विभागाने पुढील चार दिवस विदर्भासाठी ‘यलो अलर्ट’ जारी केला आहे. उष्णतेची लाट आणखी तीव्र होण्याचा इशारा देण्यात आला असून नागरिकांनी दुपारच्या वेळेत घराबाहेर पडणे टाळावे, भरपूर पाणी प्यावे आणि आवश्यक ती काळजी घ्यावी, असे आवाहन करण्यात आले आहे.
विदर्भातील वाढत्या उष्णतेच्या पार्श्वभूमीवर पोलिसांच्या आरोग्याला प्राधान्य देत अमरावती पोलीस प्रशासनाने उचललेले हे पाऊल सर्व स्तरांतून कौतुकास पात्र ठरत आहे. “कर्तव्य बजावताना पोलिसांचे आरोग्य सुरक्षित राहणे तितकेच महत्त्वाचे आहे,” असा संदेश या उपक्रमातून दिला जात असल्याची भावना नागरिकांकडून व्यक्त होत आहे.
