पुणे प्रतिनिधी
पुण्यातील वारजे परिसरात मद्यधुंद कार चालकाने अक्षरशः धुमाकूळ घालत अनेक वाहनांना धडक दिल्याची धक्कादायक घटना घडली. या चालकाला रोखण्यासाठी गेलेल्या वाहतूक पोलिसालाच कारमध्ये बसवून पळवून नेण्याचा प्रयत्न केल्याने काही काळ परिसरात मोठा तणाव निर्माण झाला. पोलिसांनी तातडीने पाठलाग करून आरोपीला अटक केली असून, संतप्त नागरिकांच्या उपस्थितीत त्याचा भररस्त्यातच ‘माज’ उतरवण्यात आला. या संपूर्ण घटनेचा व्हिडिओ सध्या सोशल मीडियावर मोठ्या प्रमाणात व्हायरल होत आहे.
हद्द झाली! पुण्यात वाहतूक पोलिसाच्या अपहरणाचा प्रयत्न, दिवसाढवळ्या नेमकं झालं काय? #pune #punepolice #Pune pic.twitter.com/b8zfFsIXJI
— Namdeo kumbhar (@kumbharnc57) April 7, 2026
मिळालेल्या माहितीनुसार, आरोपी चालक उत्तम नगरहून वारजेच्या दिशेने भरधाव वेगाने कार चालवत होता. तो मद्यधुंद अवस्थेत असल्यामुळे गाडीवरील नियंत्रण सुटले आणि वाटेत येणाऱ्या अनेक वाहनांना त्याने जोरदार धडक दिली. अचानक घडलेल्या या प्रकारामुळे रस्त्यावर मोठी खळबळ उडाली आणि नागरिकांमध्ये भीतीचे वातावरण निर्माण झाले.
या घटनेची माहिती मिळताच पोलिसांचे पथक तातडीने घटनास्थळी दाखल झाले. गाडी थांबवण्यासाठी एका वाहतूक पोलीस कर्मचाऱ्याने धाडस दाखवत कारचे दार उघडून आत प्रवेश करण्याचा प्रयत्न केला. मात्र, आरोपीने गाडी थांबवण्याऐवजी ती अधिक वेगाने पुढे दामटली आणि त्या पोलिसालाच कारमध्ये घेऊन पळ काढण्याचा प्रयत्न केला. त्यामुळे काही क्षणांसाठी परिस्थिती आणखी गंभीर झाली.
दरम्यान, इतर पोलिसांनी तात्काळ पाठलाग सुरू केला. काही अंतरावर आरोपीची कार अडवण्यात पोलिसांना यश आले. त्यानंतर पोलिसांनी कारला घेराव घालत चालकाला बाहेर काढले. घटनास्थळी जमलेल्या संतप्त नागरिकांसमोर पोलिसांनी आरोपीचा चांगलाच समाचार घेतल्याचेही व्हिडिओमध्ये दिसत आहे.
उत्तम नगर ते वारजे या मार्गावर घडलेल्या या प्रकारामुळे काही काळ वाहतुकीचा खोळंबा झाला होता. आरोपीने एकामागून एक अशा अनेक वाहनांना धडक दिल्याने वाहनचालकांमध्ये भीतीचे वातावरण पसरले होते.
या प्रकरणी पोलिसांनी संबंधित चालकाला ताब्यात घेतले असून त्याच्याविरोधात गुन्हा दाखल करण्यात आला आहे. तो नेमका किती प्रमाणात मद्यधुंद होता, तसेच या प्रकारात आणखी कोणाचा सहभाग आहे का, याचा तपास पोलिसांकडून सुरू आहे.
