सातारा प्रतिनिधी
केंद्रीय लोकसेवा आयोगाच्या (UPSC) कठीण परीक्षेत यश मिळवून साताऱ्यातील ओमकार पवार यांनी आयएएस अधिकारी होण्याचे स्वप्न साकार केले. चार वेळा अपयश येऊनही हार न मानता सातत्याने प्रयत्न केल्यामुळे अखेर त्यांनी १९४ वा क्रमांक मिळवत आयएएस पद मिळवले. शेतकरी कुटुंबातील मुलाने जिद्द, मेहनत आणि चिकाटीच्या जोरावर गाठलेले हे यश अनेकांसाठी प्रेरणादायी ठरत आहे.
ओमकार पवार हे सध्या जिल्हा परिषदेत मुख्य कार्यकारी अधिकारी (सीईओ) म्हणून कार्यरत असून त्यांच्या कामकाजामुळे ते नेहमीच चर्चेत असतात. देशासाठी काहीतरी करण्याची इच्छा मनात ठेवून त्यांनी केंद्रीय लोकसेवा आयोगाची परीक्षा देण्याचा निर्णय घेतला.
ओमकार पवार यांचे मूळ गाव सातारा जिल्ह्यात आहे. त्यांच्या आईचे स्वप्न पूर्ण करण्यासाठी त्यांनी यूपीएससीची वाट धरली. आयएएस अधिकाऱ्यांना मिळणारा सन्मान पाहून आपल्या मुलालाही असा मान मिळावा, अशी त्यांच्या आईची इच्छा होती. त्या स्वप्नानेच ओमकार यांना या ध्येयासाठी प्रेरित केले.
ओमकार पवार यांचे प्राथमिक व माध्यमिक शिक्षण सरकारी शाळेत झाले. त्यानंतर त्यांनी पुण्यातील महाविद्यालयातून अभियांत्रिकीचे शिक्षण पूर्ण केले. अभियांत्रिकी क्षेत्रात करिअर करण्याची त्यांची फारशी इच्छा नसली तरी कुटुंबाच्या इच्छेमुळे त्यांनी हे शिक्षण पूर्ण केले. अभियांत्रिकीच्या शेवटच्या वर्षापर्यंत त्यांनी यूपीएससी देण्याचा विचारही केला नव्हता.
दरम्यान, आयएएस अधिकारी श्रीकर परदेशी यांच्या कार्याने प्रेरित होऊन त्यांनी नागरी सेवेकडे वळण्याचा निर्णय घेतला. सॉफ्टवेअर इंजिनियरिंगचे शिक्षण घेत असतानाच त्यांच्या मनात नागरी सेवेची ओढ निर्माण झाली आणि त्यांनी त्यासाठी तयारी सुरू केली.
ओमकार यांनी २०१५ मध्ये पहिल्यांदा यूपीएससीची परीक्षा दिली. मात्र सलग चार प्रयत्नांमध्ये त्यांना अपयशाचा सामना करावा लागला. तरीही त्यांनी हार मानली नाही. सातत्याने अभ्यास करत त्यांनी प्रयत्न सुरूच ठेवले. अखेर २०२० मध्ये त्यांनी आयपीएस पद मिळवले. मात्र त्यांचे अंतिम ध्येय आयएएस होणे हेच होते.
त्यामुळे त्यांनी पुन्हा प्रयत्न करत २०२२ मध्ये यूपीएससी परीक्षा दिली आणि १९४ वा क्रमांक मिळवत आयएएस पदाला गवसणी घातली. शेतकरी कुटुंबातून आलेल्या ओमकार पवार यांच्या या यशोगाथेने अनेक तरुणांसमोर जिद्द आणि चिकाटीचे उदाहरण उभे केले आहे.
