मुंबई प्रतिनिधी
मुंबई उपनगरीय रेल्वेतील दैनंदिन गर्दीतून उद्भवलेल्या एका क्षुल्लक वादाचे रूपांतर भीषण हत्येत झाले. मालाड रेल्वे स्थानकावर शनिवारी सायंकाळी लोकलमधून उतरताना झालेल्या वादातून एका शिक्षकाची धारदार शस्त्राने भोसकून हत्या करण्यात आली. या घटनेने उपनगरी रेल्वे प्रवाशांमध्ये भीतीचे वातावरण पसरले असून, रेल्वे पोलिसांनी अवघ्या १२ तासांत मुख्य आरोपीला अटक करून प्रकरणाचा छडा लावला आहे.
मृत शिक्षकाचे नाव अलोक सिंग (वय अंदाजे ४५) असे असून ते प्राध्यापक म्हणून कार्यरत होते. या प्रकरणी ओंकार शिंदे (रा. मुंबई) या तरुणाला रेल्वे पोलिसांनी अटक केली आहे.
नेमकी घटना काय?
पोलिसांकडून मिळालेल्या माहितीनुसार, शनिवारी सायंकाळी मालाड रेल्वे स्थानकाच्या प्लॅटफॉर्म क्रमांक एकवर प्रवाशांची मोठी गर्दी होती. सायंकाळच्या गर्दीच्या वेळेत अलोक सिंग हे लोकलमधून उतरत असताना त्यांचा समोरून येणाऱ्या एका प्रवाशाशी धक्का लागला. या धक्क्यावरून दोघांमध्ये शाब्दिक वाद झाला. सुरुवातीला हा वाद क्षुल्लक स्वरूपाचा होता; मात्र काही क्षणांतच तो हिंसक वळणावर गेला.
वादाच्या भरात आरोपी ओंकार शिंदे याने अचानक धारदार शस्त्र काढून सिंग यांच्यावर हल्ला केला. आरोपीने त्यांच्या पोटात शस्त्र खुपसल्याने सिंग हे जागीच कोसळले. रक्ताच्या थारोळ्यात पडलेल्या सिंग यांना तत्काळ जवळच्या रुग्णालयात दाखल करण्यात आले; मात्र उपचारापूर्वीच त्यांचा मृत्यू झाल्याचे डॉक्टरांनी घोषित केले.
घटनेनंतर रेल्वे परिसरात खळबळ
भर रेल्वे स्थानकात घडलेल्या या घटनेमुळे प्रवाशांमध्ये एकच खळबळ उडाली. हल्ल्यानंतर आरोपीने गर्दीचा फायदा घेत घटनास्थळावरून पलायन केले. काही काळासाठी स्थानक परिसरात गोंधळाची स्थिती निर्माण झाली होती.
घटनेची माहिती मिळताच रेल्वे पोलिसांनी तातडीने घटनास्थळी धाव घेत तपास सुरू केला. स्थानकावरील आणि परिसरातील सीसीटीव्ही फुटेज तपासण्यात आले. फुटेजच्या आधारे आरोपीची ओळख पटवण्यात पोलिसांना यश आले.
सीसीटीव्ही व तांत्रिक तपासाच्या आधारे आरोपी अटकेत
सीसीटीव्ही चित्रफिती आणि तांत्रिक तपासाच्या मदतीने रेल्वे पोलिसांनी आरोपीचा माग काढला. अवघ्या १२ तासांच्या आत ओंकार शिंदे याला ताब्यात घेण्यात आले. त्याला पुढील चौकशीसाठी बोरिवली रेल्वे पोलीस ठाण्यात नेण्यात आले आहे.
रागातून हत्या की अन्य काही कारण?
सध्या आरोपीची कसून चौकशी सुरू असून, ही हत्या केवळ क्षणिक रागातून झाली की यामागे आणखी काही वैयक्तिक किंवा पूर्ववैमनस्याचे कारण आहे, याचा तपास पोलिसांकडून केला जात आहे. या प्रकरणी हत्या आणि शस्त्र वापरासंदर्भातील गंभीर कलमांखाली गुन्हा दाखल करण्यात आला आहे.
दरम्यान, लोकल रेल्वेतील वाढती गर्दी, किरकोळ वाद आणि त्यातून उद्भवणारी हिंसा याबाबत पुन्हा एकदा गंभीर प्रश्न उपस्थित झाले असून, प्रवाशांच्या सुरक्षेसाठी अधिक प्रभावी उपाययोजनांची गरज व्यक्त केली जात आहे.
