मुंबई प्रतिनिधी
देशभरात झपाट्याने विस्तारलेल्या ‘१० मिनिटांत डिलिव्हरी’ सेवांवर केंद्र सरकारने महत्त्वाचा निर्णय घेतला आहे. डिलिव्हरी कामगारांच्या सुरक्षिततेचा प्रश्न ऐरणीवर आल्यानंतर ब्लिंकिट, झेप्टो, स्विगी इन्स्टामार्टसारख्या प्लॅटफॉर्मद्वारे दिली जाणारी ‘१० मिनिटांत डिलिव्हरी’ सेवा बंद करण्याचा निर्णय घेण्यात आला आहे. वेळेच्या अतिरेकाच्या दबावामुळे वाढणाऱ्या अपघातांच्या पार्श्वभूमीवर हा निर्णय घेण्यात आल्याचे केंद्र सरकारकडून स्पष्ट करण्यात आले.
गेल्या काही महिन्यांपासून अतिजलद डिलिव्हरीच्या स्पर्धेमुळे कामगारांना असुरक्षित पद्धतीने वाहन चालवावे लागत असल्याच्या तक्रारी वाढल्या होत्या. ठरावीक वेळेत ऑर्डर पोहोचवण्याच्या दबावामुळे वाहतूक नियमांकडे दुर्लक्ष होत असून, त्यातून अपघातांचे प्रमाण वाढत असल्याचे निदर्शनास आले होते. या प्रश्नाकडे लक्ष वेधण्यासाठी ३१ डिसेंबर रोजी देशभरातील डिलिव्हरी कामगारांनी संप पुकारत आंदोलन केले होते.
या आंदोलनाची गंभीर दखल घेत केंद्रीय कामगार मंत्री मनसुख मांडविया यांनी संबंधित कंपन्यांशी चर्चा केली. या चर्चेनंतर ब्लिंकिटने आपल्या सेवांमधून ‘१० मिनिटांत डिलिव्हरी’चा पर्याय अधिकृतपणे हटवला आहे. डिलिव्हरी कर्मचाऱ्यांचे आरोग्य, सुरक्षितता आणि कामाच्या अटी यांना प्राधान्य देणे आवश्यक असल्याचे सरकारने स्पष्ट केले आहे.
सरकारच्या या निर्णयामुळे डिलिव्हरी कर्मचाऱ्यांवरील वेळेचा ताण कमी होऊन रस्ते अपघातांचे प्रमाण घटण्याची अपेक्षा व्यक्त केली जात आहे. मात्र, ग्राहकांना अतिजलद सेवा देणाऱ्या व्यावसायिक मॉडेलला यामुळे फटका बसण्याची शक्यता आहे. येत्या काळात इतर ई-कॉमर्स व क्विक-कॉमर्स कंपन्या या निर्णयाचे पालन करतात का, याकडे सर्वांचे लक्ष लागले आहे.
