सोलापूर प्रतिनिधी
सोलापूरच्या मध्यवर्ती एसटी स्थानकातील सुरूच असलेल्या दुरवस्थेवर परिवहन मंत्री तथा एसटी महामंडळाचे अध्यक्ष प्रताप सरनाईक यांनी गुरुवार (२८ नोव्हेंबर) रोजी अचानक पाहणीदरम्यान संताप व्यक्त करत आगार व्यवस्थापकाला थेट निलंबित करण्याचे आदेश दिले.
सोलापूर बसस्थानकावरील अस्वच्छ शौचालयाबद्दल आगार व्यवस्थापक निलंबित…! pic.twitter.com/JP2ZfbGlAS
— Maharashtra State Road Transport Corporation (@msrtcofficial) November 28, 2025
आठ दिवसांपूर्वी सरनाईक यांनी स्थानकाला भेट देत स्वच्छता आणि सुविधा सुधारण्यासाठी आगार प्रशासनाला अंतिम मुदत दिली होती. मात्र दिलेल्या सूचनांकडे स्थानिक प्रशासनाने दुर्लक्ष केल्याचे पुन्हा स्पष्ट झाल्याने ही कारवाई करण्यात आली.
स्थानकातील प्रसाधनगृहाच्या पाहणीवेळी अस्वच्छता, दुर्गंधी, उखडलेल्या फरशा, खाजगी संस्थेकडे असलेली व्यवस्थापनाची ढिसाळता याचा मंत्री सरनाईक यांनी जाब विचारला. पाणपोई परिसराही तितकाच बेकार अवस्थेत असल्याचे आढळले. पाच नळांपैकी केवळ एकच नळ कार्यरत होता. या सर्व बाबींबाबत आगार व्यवस्थापक आणि वाहतूक नियंत्रक समाधानकारक उत्तर देऊ शकले नाहीत.
शिस्तभंगाची जबाबदारी निश्चित करत सरनाईक यांनी तत्काळ निलंबनाचे आदेश एसटी महामंडळाच्या उपाध्यक्ष आणि व्यवस्थापकीय संचालकांना दिले. मागील पाहणीवेळी दिलेल्या निर्देशांचे पालन न झाल्याने कठोर भूमिका घेण्याची वेळ आल्याचे त्यांनी स्पष्ट केले.
राज्यातील इतर २५१ आगार प्रमुखांनीही या घटनेकडून धडा घ्यावा, प्रवाशांच्या मुलभूत सुविधांकडे,विशेषत महिला प्रसाधनगृहाबाबत,कोणतीही हलगर्जीपणा आता खपवून घेतला जाणार नाही, असा स्पष्ट इशाराही सरनाईक यांनी दिला. पुढील भेटीत पुन्हा समीक्षा केली जाणार असून हलगर्जीपणा आढळल्यास आणखी कठोर कारवाईची शक्यता वर्तवण्यात आली आहे.
